Avropa Şərq Tərəfdaşlığı Məktəbində təhsil müsabiqəsi

Bakı/27.01.21/Turan: Avropa İttifaqı 16-17 yaşlı məktəblilər üçün Avropa Şərq Tərəfdaşlığı Məktəbində təlim proqramı üzrə müsabiqə elan edib.

Müsabiqədə Avropa və Avropa İttifaqı haqqında biliklərini genişləndirmək istəyən Şərq Tərəfdaşlığı ölkələrinin sakinləri iştirak edə bilərlər.

Təhsil 1 sentyabr 2021-ci ildə başlayacaq. Ərizələr fevralın 26-dək qəbul olunur

Avropa İttifaqı seçim prosesindən keçmiş bütün şagirdlərə təhsil haqqı, yaşayış və məktəbdə qidalanma, Tbilisidən evə qayıtma xərclərini, eləcə də bütün lazımi tədris materialları və resurslarla təminat və tibbi sığortanı əhatə edən tam təqaüd təklif edir.

Tbilisidəki Şərq Tərəfdaşlığı Avropa Məktəbinin məzunlarına 75 ölkədə 2000-dən artıq universitetdə qəbul olunan və dünyanın bir çox kollec və universitetləri tərəfindən geniş tanınan Beynəlxalq Bakalavriat (IB) diplomu verilir.

Aİ tərəfindən maliyyələşdirilən təqaüd proqramı, altı ŞT ölkəsindən 40-a yaxın şagirdin avropaşünaslıq ixtisası üzrə IB diplomu almasına dəstək olacaq.

Diplom proqramı Avropa məktəblərinin təhsil sistemindən ilhamlanan ixtisaslaşmış tədris ilə nəzəri bacarıqları birləşdirir. Təhsil, inşa və tədris fəaliyyətləri boyunca şagirdlərə Avropa dilləri, ədəbiyyatı və tarixi haqqında biliklərini dərinləşdirərək Avropanın multikulturalizm və çoxdillilik dəyərlərini təbliğ edən Avropayönlü təhsil proqramı tədris olunacaq.

Şərq Tərəfdaşlığı Avropa Məktəbi, altı ŞT ölkəsində gənclər üçün təhsil imkanları və regionlararası mübadiləni gücləndirmək istiqamətində Avropa İttifaqı və tərəfdaş ölkələrin səylərinin bir hissəsi olaraq yaradılıb. 2020-ci ilin sentyabrında 40-a qədər şagird qəbul edən məktəbdə hazırda bu proqram üzrə 65 şagird təhsil alır. Maraqlanan şagirdlər göstərilən tarixə qədər internet səhifəsi vasitəsilə müraciət etməlidirlər:

www.eapeuropeanschool.eu 26 fevral 2021, Tbilisi vaxtı ilə 12:00 (UTC +4:00). Seçim prosesində ilkin mərhələdə seçilmiş namizədlər üçün Zoom onlayn platforması vasitəsilə yazılı testlər və müsahibələr nəzərdə tutulub. 2021-2022-ci tədris ili üçün təqaüd alanların siyahısı 2021-ci il may ayının sonuna qədər açıqlanacaq. Seçilmiş şagirdlərin sözügedən təqaüd proqramının əhatə etdiyi təhsil müddətində tam iştirakı gözlənilir.–71D-