Avropa Şurası Avropa Sülh Fondu çərçivəsində Ukraynaya hərbi dəstəyi artırmağa razılaşıb

Bakı/24.05.22/Turan: Mayın 24-də Avropa Şurası Avropa Sülh Fondu  çərçivəsində iki qərar qəbul edib. Bu qərarlar Ukrayna Silahlı Qüvvələrinin ölkənin ərazi bütövlüyünü və suverenliyini qorumaq imkanlarını dəstəkləyəcək, eləcə də mülki əhalini Rusiyanın hərbi təcavüzündən qoruyacaq.

Bundan öncə 1,5 milyard avro məbləğində belə dəstəyin üç tranşının qəbulundan sonra dördüncü tranş Ukrayna üçün daha 500 milyon avro əlavə edəcək, Avropa Şurasının mətbuat xidməti bildirib.

“Sabahın tarixi bu gün, Ukraynanın savaş meydanlarında yazılır. Bu 500 milyon avroya Avropa İttifaqı üzvləri tərəfindən Ukrayna Silahlı Qüvvələrinə  hərbi texnika göndəriləcək. Bu, Ukraynaya özünü müdafiə etmək üçün Avropa səylərinin, sadəcə, bir hissəsidir. Biz bunu müharibə başlayandan edirik və sona qədər də davam etdirəcəyik”, - Avropa İttifaqının xarici işlər və təhlükəsizlik siyasəti üzrə ali nümayəndəsi Josep Borrel bildirib.

Yeni paket çərçivəsində silahlanmanın həcmi Ukrayna hökumətinin tələblərinə cavab verir. Buraya,hərbi texnika üçün 490 milyon avro, həmçinin fərdi müdafiə vasitələri, tibbi vasitələr və yanacaq üçün 10 milyon avro daxildir.02D