Azad edilmiş ərazilərin bərpası üzrə konsepsiya hazırlanacaq

Bakı/07.01.21/Turan: Azad edilmiş ərazilərdə bütün yaşayış məntəqələrinin bərpası üzrə vahid konsepsiya yaradılmalıdır. Bu barədə dövlət başçısı İlham Əliyev yanvarın 6-da keçirilən müşavirədə bildirib.

İlk növbədə, böyük yaşayış məntəqələrinin bərpası üzrə planlar hazırlanacaq. Oraya qayıdan adamlar bütün şəraitlə, o cümlədən kənd təsərrüfatı işləri üçün kifayət qədər torpaq sahələri ilə təmin olunmalıdırlar.

Prezident Administrasiyasının rəhbəri Samir Nuriyev bildirib ki, bərpa məsələlərinin həlli ilə 24 noyabr 2020-ci ildə yaradılmış Əlaqələndirmə Qərargahı məşğul olur. Bu qurumun tərkibində müxtəlif istiqamətlər üzrə 16 işçi qrupu fəaliyyət göstərir. İlk növbədə, söhbət şəhərsalma və abidələrin bərpasından gedir. İnfrastrukturun bərpası və enerji təchizatı ilə bağlı işlər aparılır. Ümumilikdə, strateji fəaliyyət planı hazırlanıb və bu plan yaşayış məntəqələrinin bərpası üzrə işləri əhatə edir. Şuşa şəhərinin baş planının hazırlanması işinə başlanılıb. İşin yekunları yaxın vaxtlarda dövlət başçısına təqdim olunacaq, - S.Nuriyev qeyd edib. -02D-