Azərbaycan daha 95 hərbiçinin meyitini Ermənistan tərəfə təhvil verib

Bakı/20.09.22/Turan: Ermənistan Silahlı Qüvvələrinin 2022-ci ilin 12-14 sentyabr tarixlərində Azərbaycan-Ermənistan sərhədində törətdikləri genişmiqyaslı təxribatlara qarşı Azərbaycan Ordusunun əks-hücum əməliyyatı nəticəsində həlak olaraq ərazidə qalmış erməni hərbi qulluqçularına aid meyitlərin axtarışı həyata keçirilib.

Dövlət Təhlükəsizliyi Xidmətinin məlumatına görə, sentyabrın 20-də 95 erməni hərbçisinin meyitinə Azərbaycan Respublikasının Hərbi Prokurorluğunun iştirakı ilə baxış keçirildikdən və onların üzərində hər hansı zorakılıq əlamətlərinin olmaması müəyyən edildikdən sonra onlar Beynəlxalq Qızıl Xaç Komitəsinin vasitəçiliyi ilə Ermənistan tərəfinə təhvil verilib.

"Ermənistan hərbçilərinin cəsədlərinin qarşı tərəfə təhvil verilməsi ilə bağlı humanitar proses davam etdiriləcəkdir", deyə məlumatın sonunda qeyd edilib. Bu, o deməkdir ki, həlak olan erməni hərbiçilərinin sayı bununla məhdudlaşmır.

Xatırladaq ki, Azərbaycan sentyabrın 17-də artıq 32 meyiti Ermənistana təhvil verib.

İndiyədək Ermənistan sərhəddə son döyüşlər zamanı 207 nəfərin həlak olduğunu etiraf edib. İndi bu say 302 nəfərə çatıb. 02D