Azərbaycan diasporası “Spravedlivaya Rossiya”nın bəyanatını pisləyir

Bakı/29.03.21/Turan: Rusiya Azərbaycanlılarının Federal Milli-Mədəni Muxtariyyətinin (AzerRos) prezidenti Xanoğlan Əliyev Rusiya Federasiyası Dövlət Dumasının sədrinə, habelə “Spravedlivaya Rossiya” (“Ədalətli Rusiya”) Partiyasının rəhbərliyinə, Rusiya Federasiyası Baş Prokurorluğuna və Rusiya Federasiyasının İstintaq Komitəsinə “Spravedlivaya Rossiya”nın mərkəzi aparat rəhbərinin müavini Nikolay Noviçkovun təxribat xarakterli bəyanatı ilə əlaqədar müraciət göndərib.

“Rusiya Azərbaycanlılarının Federal Milli-Mədəni Muxtariyyəti adından və şəxsən öz adımdan açıq şəkildə seçkiqabağı “Spravedlivaya Rossiya – Za pravdu” (“Ədalətli Rusiya – Həqiqət naminə”) proqramına digər ərazilərlə yanaşı, Dağlıq Qarabağın – Azərbaycan Respublikasının ayrılmaz hissəsinin də Rusiya Federasiyasına birləşdirilməsi hesabına Rusiya ərazisinin genişləndirilməsi haqqında tezis daxil etməyə hazırlaşdığını bəyan edən “Spravedlivaya Rossiya” Partiyasının Mərkəzi Aparat rəhbərinin müavini Nikolay Noviçkovun təxribat xarakterli bəyanatları ilə əlaqədar müraciət etməyi zəruri hesab edirəm”, deyə müraciətdə bildirilir.

Əliyev Rusiya prezidenti Vladimir Putinin dəfələrlə “Dağlıq Qarabağın suveren Azərbaycanın beynəlxalq səviyyədə tanınmış hissəsi olduğunu” bəyan edib.

Həmçinin, Rusiya lideri dəfələrlə bildirib ki, dövlətin ərazi bütövlüyü və dövlət sərhədlərinin toxunulmazlığı, eləcə də xarici və daxili siyasi və ictimai qüvvələrin əməlləri nəticəsində dövlətin təşkilinin bu əsas prinsiplərinin potensial pozulması mümkünlüyünə qarşı yönəlmiş hüquqi mexanizmlərin yaradılması həm Rusiya üçün, həm də  digər suveren dövlət üçün həddindən artıq əhəmiyyətlidir.

“Belə təxribat xarakterli istənilən çağırışları, xüsusən Rusiya Azərbaycanlılarının da üzvü olduğu “Spravedlivaya Rossiya” siyasi partiyası adından edilən çağırışı qəbuledilməz hesab edirəm. Bu cür bəyanatlar millətlərarası sabitliyi, Rusiyada razılığı və sülhü pozur, əsrlər boyunca formalaşmış və Rusiya Federasiyası və Azərbaycan rəhbərlərinin şəxsi, dostluq münasibətləri ilə möhkəmlənmiş dövlətlərarası münasibətlərdə təfriqə yaradır.

“Spravedlivaya Rossiya” partiyasının məsul şəxsinin bu cür ifadələrinin yolverilməz olduğuna diqqətinizi çəkmək istəyirəm, onun əməlini pisləməyə, müvafiq tənqidi qiymət verməyə çağırıram. Ümid edirəm ki, Rusiya Federasiyası Dövlət Dumasının rəhbərliyi deputat Nikolay Noviçkovun deputat etikası ilə bir araya sığmayan bu ifadələrinə diqqət yetirəcək və onun intizam məsuliyyətinə cəlb edilməsi məsələsini nəzərdən keçirəcək.

Rusiya Federasiyasının İstintaq Komitəsindən və Rusiya Federasiyasının Baş Prokurorluğundan Rusiya vətəndaşı Nikolay Noviçkovun əməllərində Rusiya Federasiyası Cinayət Məcəlləsinin 354-cü maddəsində (kütləvi informasiya vasitələrindən istifadə ilə təcavüzkar müharibə başlatmağa açıq çağırışlar) nəzərdə tutulmuş cinayət əlamətlərinin olub-olmadığını yoxlamağı xahiş edirəm”, deyə müraciətdə bildirilir. -02D-