Azərbaycan-Ermənistan düşmənçiliyinin yenidən artmasında Moskvanın maraqları

Bakı/27.05.21/Turan: Azərbaycanla Ermənistan arasında yeni gərginlik yaranır. Yenə də hərbi qulluqçular həlak olur və əsir düşürlər. Mayın 25-də Ermənistan Müdafiə Nazirliyi bildirib ki, Geqarkunik vilayətində Verin Şorja sərhədyanı sahəsində düşmən tərəfindən açılan atəşdən sonra başlayan atışma nəticəsində muzdlu hərbçi, kiçik çavuş Xurşudyan ölümcül yaralanıb. Azərbaycan Müdafiə Nazirliyi erməni əsgərin ölümündə Azərbaycanın günahını istisna edib və bildirib ki, bizim ordumuz atəş açmayıb.

Çərşənbə günü brifinq zamanı Rusiya Xarici İşlər Nazirliyinin rəsmi nümayəndəsi Mariya Zaxarova Ermənistan-Azərbaycan sərhəddində erməni hərbçinin ölümünə səbəb olan insidentləri Ermənistan İctimai Televiziyasının jurnalistinin xahişilə şərh edib.

"Sərhəd insidentinə gəlincə, onun Dağlıq Qarabağ probleminə birbaşa aidiyyəti yoxdur. Əsas səbəb hələ sovet dövründən miras qalmış Azərbaycan-Ermənistan sərhəddinin beynəlxalq-hüquqi rəsmiləşdirilməsinin olmamasıdır. Biz bunu əsas götürürük ki, bu cür halları yalnız dinc danışıqlar yolu ilə həll etmək lazımdır", - Zaxarova deyib.

O, növbəti frazada uzunmüddətli həll kimi Azərbaycan-Ermənistan sərhəddinin demarkasiyası ilə delimitasiya prosesinin işə salınmasını qeyd edib, faktiki olaraq, Bakının da bu tələblərini dəstəkləyib. "Rusiya buna hər cür kömək etməyə hazırdır", - Zaxarova bildirib.

Bundan sonra gərginlik artıb. Mayın 27-də gecə saat üçdə erməni təxribatları davam edib. Azərbaycan Müdafiə Nazirliyinin məlumatına görə, erməni təxribat qrupu Kəlbəcər rayonunun Yuxarı Ayrım kəndi ərazisini minalamağa cəhd edib. Əməliyyat tədbirləri nəticəsində altı erməni hərbçi mühasirəyə alınıb və əsir götürülüb. Daha sonra erməni tərəfi zirehli texnikadan istifadə etməklə təxribatı davam etdirməyə çalışsa da, Azərbaycan ordusunun cavab tədbirləri ilə düşmən əməliyyata son qoymağa məcbur olub.

Azərbaycanda mətbuatda və sosial şəbəkələrdə baş verənləri şərh edirlər. İctimai fəal Rəsul Cəfərov altı yeni əsirin təxribatçılar siyahısına daxil edilməsini, onların Azərbaycana qarşı cinayətə görə mühakimə olunmasını və bundan öncə əsir götürülmüş təxribatçıların Ermənistana verilməsinin dayandırılmasını təklif edir.

Keçmiş xarici işlər naziri Tofiq Zülfüqarov hesab edir ki, sərhəddə erməni təxribatları yeni münaqişə zonası yaratmaq və vasitəçiləri cəlb etmək, ola bilsin ki, Minsk Qrupunu geri qaytarmaq məqsədi güdür. Növbəti mərhələdə təhlükəsizlik rejimini müşahidə etmək üçün beynəlxalq missiya yaradılsın. Zülfüqarov deyir ki, Paşinyan Rusiyanı Qafqaz üzərində inhisarçı nəzarətdən məhrum etməkdə maraqlıdır.

Politoloq Ərəstun Oruclu Turan ilə söhbətində Rusiyanı son üç həftə ərzində hadisələrin əsas təşəbbüskarı adlandırıb. Onun fikrincə, Moskvanın məqsədi regionda kommunikasiyaların bərpası prosesini sürətləndirməkdir ki, bu da Qafqazda və Yaxın Şərqdə öz niyyətlərini həyata keçirmək üçün Rusiyaya lazımdır. Moskva öz vəzifələrini yerinə yetirmək üçün iki ölkəni - Azərbaycan və Ermənistanı toqquşdurmağa hazırdır, odur ki, regionda lokal toqquşmalar mümkündür.—0—