Azərbaycan Ermənistanla sərhəddə daha bir gömrük-sərhəd məntəqəsi yaradıb

Bakı/15.11.21/Turan: Noyabrın 15-də gecəyarısı Azərbaycan öz ərazisindən keçən Qafan-Çakaten yolunun bir hissəsində blokpost qurub. Bu barədə Ermənistan kütləvi informasiya vasitələri məlumat yayıblar. Bununla da bir neçə erməni kəndi ayrılmış olub və Qafan şəhərinə getmək üçün 8 kilometr əvəzinə 140 kilometr getmək lazım gələcək. Ermənistan hakimiyyəti bu ilin sonuna qədər dolama yolun çəkiləcəyini vəd edib.

Rəsmi Bakı hələlik vəziyyəti şərh etmir. Öz növbəsində, erməni mənbələri qeyd edirlər ki, sözgedən yolda Azərbaycanın 100-120 hərbçi yerləşib, postu onlar qurublar.

Qeyd edək ki, Azərbaycan tərəfinin hərəkətləri Ermənistanın Mehridən (Zəngəzur dəhlizi) yol açmaqdan imtina etməsinə cavabdır.

Sözdə bütün kommunikasiyaların açılmasına tərəfdar olduğunu bildirən Ermənistan öz ərazisilə nəqliyyatın hərəkətinə nəzarət etmək istəyir. Eyni zamanda, ermənilər hesab edirlər ki, Laçın dəhlizi və sərhəd yolları da daxil olmaqla, Azərbaycan ərazisilə sərbəst hərəkət edə bilərlər.

Bundan öncə Azərbaycan tərəfindən analoji post sərhəd yolunun digər hissəsində – Gorus-Qafan sahəsində qoyulub.. Bu, həm də sərhədyanı erməni kəndləri üçün ciddi problemlər yaradıb. -02B-