Azərbaycan müxalifəti Əliyev və Ərdoğanı hərbi müttəfiqliyə çağırıb

Bakı/20.11.20/Turan: Azərbaycanın müxalifət və ekspert birliyinin nümayəndələri prezident İlham Əliyevi və Türkiyənin dövlət başçısı Rəcəb Tayyib Ərdoğanı iki ölkə arasında hərbi müttəfiqliyə çağırıblar.

“Türkiyə Cümhuriyyətinin Azərbaycannın   öz  ərazi   bütövlüyünün   bərpası  istiqamətində  düşmənlə  savaşda  göstərdiyi siyasi, mənəvi, diplomatik,  logistik dəstəyi  yüksək qiymətləndirir  və  ölkəmizin  bu  haqq  işində   bütün  kənar   təzyiqlərə   rəğmən   sərgilənmiş   əzmkar  mübarizəyə   görə   təşəkkür   edirik.  Hesab   edirik  ki,   xilaskar  Azərbaycan  ordusu  Türkiyə Silahlı Qüvvələri   ilə    hərbi əməkdaşlıq  sayəsində   qazandığı   təcrübədən  də  yararlanaraq  torpaqlarımızın  işğaldan azad olunması zamanı  yüksək  döyüş qabliyyəti   göstərib və   bu  səbəbdən  də  döyüşlərdə  itkiləri  az olub”, - müraciətdə deyilir.

Sonra müraciətdə Rusiyanın noyabrın 10-da imzalanmış atəşkəs haqda üçtərəfli sazişin şərtlərini pozmasına diqqət yetirilib

Belə ki,   Rusiya   Müdafiə Nazirliyi üçtərəfli  bəyanatın  şərtlərini kobud  şəkildə  pozaraq  Qarabağda “sülhməramlı”ların  istifadəsi  üçün  nəzərdə tutulmayan   hərbi  texnikalar - hava  hücumundan  müdafiə  sistemləri,   helikopterlər, aviasiya  vasitələri, radio-texniki kəşfiyyat  stansiyaları və s. yerləşdirməklə   yanaşı   bəyanatda  nəzərdə   tutulmayan  ərazilərimizdə - Şuşa, Kəlbəcər  və Ağdamda  da   müşahidə  məntəqələri  qurmaq  və  patrul   xidməti   təşkil   etmək   iddiasındadır.

Bəyanatda  Rusiya  "sülhməramlı"  kontingentinin  Qarabağda  erməni  silahlı  qüvvələrinin  çıxarılmasına  paralel  olaraq  yerləşdirilməsi  nəzərdə  tutulsa  da  Ermənistanın baş  naziri   bəyanat  verərək    hərbi  birləşmələrin  Dağlıq  Qarabağ  ərazisindən çıxarılmayacağını  bildirməsi,  vasitəçi  tərəf  kimi  Rusiyanın bu istiqamətdə  heç  bir  tədbir  görməməsi ciddi  narahatlıq  yaradır.

Atəşkəsə  nəzarət  üzrə   Sülhməramlı  Nəzarət  Mərkəzinin  yaradılması   gecikdirilir, ermənilərin   geri  qayıtmasının  BMT Qaçqınlar  üzrə  Ali  Komissarlığının  ofisinin  nəzarəti  altında  həyata  keçirilməsi  nəzərdə  tutulsa  buna da əməl olunmur. 

Rusiya  tərəfindən  bölgədə müzakirə və məsləhətləşmələr birbaşa olaraq qondarma "Dağlıq Qarabağ Respublikası”nın  “prezident”i ilə aparılır və Azərbaycanın ərazi bütövlüyü prinsiplərinə, Dağlıq Qarabağda  suveren  hüquqlarının   təmin  olunmasına  əməl edilmir.

Kəlbəcərin  boşaldılması   qrafiki  pozulmaqla  yanaşı  ermənilər  oradakı  yaşayış yerlərini tərk edərkən "sülhməramlılar”ın gözü qarşısında  dağıntılar,   yanğınlar törədir,  təbiətə,  ətraf mühitə  ziyan vurur, flora,  faunanı məhv edir və  ekosistemi pozurlar.

 "Sülhməramlı"  kontingentin    qüsurlu  fəaliyyəti  Azərbaycan  ictimaiyyətində   Rusiyanın  strateji  müttəfiqi   olan  Ermənistanın  bölgədəki  hərbi, siyasi  mənafeləri  ilə  uzlaşdığı   qənaətini  yaradır   və  atəşkəslə  bağlı  bəyanata  imza  atmış  qarşı tərəflərin  regionda   yenidən   hərbi  durumun   gərginləşdirilməsində  maraqlı  olduqları   fikrinin yaranmasına   səbəb  olur.

Yaranmış  indiki  arzuolunmaz şərait Azərbaycan  dövlətinin  təhlükəsizliyinin   təmin  olunması   istiqamətində  addımların  atılmasının   vacibliyini   diqtə  edir.  Bu  istiqamətdə   atılmış   ən  təsirli  addımlardan  birincisi  iki  qardaş   ölkə  arasında  hərbi   sahədə   mövcud   olan  strateji  əməkdaşlıq   münasibətlərinin   strateji   hərbi   müttəfiqlik  münasibətləri səviyyəsinə   yüksəldilməsi  ola  bilər.

“Sizi Azərbaycanın  təhlükəsizliyinin,  bütövlüyünün  və  Dağlıq  Qarabağda  suveren   hüquqlarının   təmin  edilməsi   məqsədilə  iki  qardaş  ölkə  arasında  hərbi  müttəfiqlik   münasibətlərinin   qurulması   istiqamətində   təxirəsalınmaz və təcili  addımlar   atmağa  çağırırıq”,- müraciətdə deyilir.

Müraciəti imzalayıblar: Azad Demokratlar Partiyasının rəhbəri , SülhəddinƏkbər,  Azərbaycan Demokrat  Partiyasının sədri SərdarCəlaloğlu,  AzərbaycanDemokratiya və Rifah Hərəkatının rəhbəri Qubad İbadoğlu,   Azərbaycan XalqPartiyasının sədri PənahHüseyn,  Azərbaycan Yüksəliş Partiyasının rəhbəri, Anar Əsədli, Haqq və Ədalət Partiyasının lideri  Əli İnsanov,  Milli Birlik Partiyasının rəhbəri Aydın Şükür,  Milliyyətçi Demokratlar Partiyasının sədri İlyas Abdullayev və təhlükəsizlik məsələləri üzrə ekspert  İlham İsmayıl imzalayıblar. —06D—