Azərbaycan naziri OPEC+ görüşündə iştirak edəcək

Bakı/04.12.18/Turan: Azərbaycanın energetika naziri Pərviz Şahbazov dekabrın 4-7-də Avstriyanın paytaxtı Vyana şəhərində səfərdə olacaq. Bu barədə Azərbaycan Energetika Nazirliyinin dekabrın 4-də yaydığı məlumatda deyilir.

Məlumata görə, səfər Neft İxrac Edən Ölkələr Təşkilatının (OPEC) baş katibi Məhəmməd Sanusi Barkindonun dəvəti ilə baş tutur və səfərin məqsədi Neft İxrac edən Ölkələr Təşkilatına (OPEC) üzv və kartelə daxil olmayan ölkələrin Nazirlərinin Birgə Monitorinq Komitəsinin 12-ci iclasında iştirak etməkdir.

Energetika naziri 7 dekabrda isə OPEC Nazirlər Şurasının 175-ci iclası çərçivəsində OPEC və qeyri-OPEC nazirlərinin 5-ci görüşünə qatılacaq.

Məlumatda deyilir ki, səfər zamanı bir sıra ikitərəfli görüşlər də planlaşdırılır.

Xatırladaq ki, Azərbaycan 2016-ci ldən OPEC təşkilatı ilə dünya neft bazarında tarazlığın və neftin qiymətinin sabitləşdirilməsi məqsədilə aparılan məsləhətləşmələrdə iştirak edir və hələ də iştirakını davam etdirməkdədir.

Toplantının məqsədi OPEC ölkələrinin dünya heft bazarında qyimətin qaldırılması üçün gündəlik hasilatı 1,2 milyon barel azaltmaq barədə qərar çıxarmağa nail olmaqdır. --0--