Azərbaycan ordusuna təxribatların qarşısının qətiyyətlə alınması barədə göstəriş verilib

Bakı/01.04.23/Turan: Aprelin 1-də müdafiə naziri Zakir Həsənovun rəhbərliyilə ordu komandanlıq heyətinin xidməti müşavirəsi keçirilib. Müşavirədə nazir müavinləri, qoşun növü komandanları, nazirliyin baş idarə, idarə və xidmət rəisləri, eləcə də videobağlantı vasitəsilə hərbi birlik və birləşmə komandirləri iştirak ediblər. Bu barədə hərbi idarənin mətbuat xidməti bildirib.

Nazir qeyd edib ki, “qısa müddətdə icra olunan lokal əməliyyatlar Azərbaycan ordusunun yüksək döyüş əzminin növbəti göstəricisidir”.

“Azərbaycan-Ermənistan şərti dövlət sərhədində və Qarabağ iqtisadi rayonunda mövcud əməliyyat şəraitini təhlil edən müdafiə naziri ehtimal olunan təxribatların qarşısının bundan sonra da qətiyyətlə alınması barədə müvafiq göstərişlər verib. Nazir qeyd edib ki, qarşı tərəfin, o cümlədən qanunsuz erməni silahlı birləşmələrinin bütün qanunsuz fəaliyyətləri bundan sonra da fasiləsiz nəzarətdə saxlanılmalı və gələcəkdə Azərbaycan ərazilərində bu kimi addımların atılmasına imkan verilməməlidir”, - Müdafiə Nazirliyinin məlumatında deyilir.

Sonda Zakir Həsənov azad edilmiş ərazilərdə, həmçinin yeni nəzarətə götürülən yüksəklik və mövqelərdə mühəndis təminatı tədbirlərinin daha keyfiyyətli yerinə yetirilməsi barədə konkret tapşırıqlar verib.06В