Azərbaycan parlament nümayəndə heyəti Şimali Kipr Türk Cümhüriyyətinə gedib

Bakı/16.07.21/Turan: İyulun 16-da Azərbaycan parlament nümayəndə heyəti Kipr türklərinin təhlükəsizliyinin təmin edilməsi məqsədilə Türkiyə qoşunlarının Kiprə çıxarılmasının 47-ci ildönümünün qeyd olunması mərasimində iştirak etmək üçün Şimali Kipr Türk Cümhüriyyətinə gedib, kibrispostasi.com bildirir.

Milli Məclisin Beynəlxalq məslələr və parlamentlərarası əlaqələr Komitəsinin sədri Səməd Seyidovun rəhbərlik etdiyi nümayəndə heyətini qəbul edən Şimali Kipr Türk Cümhüriyyətinin baş naziri Ersan Saner əmin olduğunu bildirib ki, Azərbaycan Respublikası Türkiyə Cümhuriyyəti ilə birlikdə Kipr türk xalqını onun milli işində dəstəkləyəcək.

Nümayəndə heyətinin tərkibinə azərbaycanlı deputatlar Asim Mollazadə, Erkin Qədirli, Nigar Arpadarayi və Nəsib Məhməliyev daxildir.

Öz növbəsində Seyidov deyib ki, onlar Avropa Şurasında Şimali Kiprin hüquqlarını və ədaləti müdafiə edəcəklər.

O həmçinin qeyd edib ki, Azərbaycanda Kipr məsələsilə bağlı hökumət və ya müxalifət yoxdur: "Bu, bizim torpağımızdır. Türk dünyasında Türkiyə var, türk dünyasında Azərbaycan var, türk dünyasında Şimali Kipr var".

Seyidov bildirib ki, onlar Şimali Kipr Türk Cümhuriyyətinə səfəri iyulun 16-dan 19-dək planlaşdırmışdılar, ancaq onlara bildirəndə ki, Türkiyə prezidenti Rəcəb Tayyib Ərdoğan iyulun 20-də Şimali Kiprdə olacaq, onlar səfəri uzatmaq qərarına gəldilər və iyulun 20-də adada olacaqlar.

Seyidov qeyd edib ki, Azərbaycanın siyasi nümayəndə heyəti Şimali Kiprə "ilk dəfə" gəlib, lakin bundan sonra səfərlər davam edəcək: "Biz istəyirik ki, Şimali Kipr güclü olsun. Türk dünyası yüksələcək. Bunun üçün Türkiyə, Azərbaycan və Şimali Kipr birlikdə olmalıdırlar", - o deyib.

Saner deyib: "Mən inanıram ki, Azərbaycan Respublikası qarşıdakı dövrlərdə bu məsələ ilə bağlı Türkiyə Cümhuriyyətini dəstəkləyəcək ". O, Kran-Montana və Cenevredə keçirilən görüşlər barədə məlumat verib.

Baş nazir bildirib ki, onlar gördülər ki, Cenevrədə yunan mentaliteti dəyişməyib və nə qədər ki bu mentalitet qalacaq, razılaşmaya nail olmaq mümkün olmayacaq. "Kiprdə sülhdür, sadəcə, saziş çatmır. Biz sülh şəraitində yaşayırıq. Şimali Kipr Türk Cümhuriyyətinin statusu gündən-günə yüksəlir. Bu il 47-ci dəfə qeyd edəcəyimiz sülh və azadlıq festivalı Qurban bayramı ilə üst-üstə düşür. Ona görə də iki bayramı birlikdə qeyd edirik. Mən sizin vasitənizlə bütün Azərbaycan xalqını Qurban bayramı münasibətilə təbrik edirəm", - Saner deyib. -0-