Azərbaycan Səudiyyə Ərəbistanını azad olunmuş ərazilərdə layihələrə dəvət edir

Bakı/24.06.21/Turan: İyunun 23-də Ər-Riyadda Azərbaycanın xarici işlər naziri Ceyhun Bayramovla  Səudiyyə Ərəbistanının investisiya naziri Xalid bin Əbdüləziz əl-Falihin görüşündə iki ölkə arasında əməkdaşlıq məsələləri müzakirə olunub.

Xarici İşlər Nazirliyinin mətbuat xidmətinin məlumatına görə, Bayramov iki ölkə arasında energetika, kənd təsərrüfatı, turizm və dağ-mədən sənayesi sahəsində iqtisadi əməkdaşlığın prioritet istiqamətlərini açıqlayıb.

Azərbaycanın azad edilmiş ərazilərində infrastruktur layihələrinə toxunan Bayramov Səudiyyə tərəfini bu layihələrdə iştiraka dəvət edib.

Eyni zamanda, o, Azərbaycandan Səudiyyə Ərəbistanına kənd təsərrüfatı məhsullarının ixracını artırmağı təklif edib.

Xalid əl-Falih isə öz növbəsində bərpa olunan enerji mənbələri və neft-kimya sahəsində əməkdaşlığın mümkünlüyünü xatırladıb. Səudiyyə şirkətlərinin Azərbaycanda layihələrdə iştirakda maraqlı olduğunu vurğulayan nazir bildirib ki, bu, Ər-Riyadda birgə hökumətlərarası komissiyanın bu ilin payızında keçiriləcək iclasında müzakirə olunacaq.-02D-