Azərbaycan və Ermənistan XİN başçıları Minskdə söhbət ediblər

Bakı/22.06.18/Turan: Azərbaycan və Ermənistan XİN başçıları Elmar Məmmədyarov və Zograb Mnatsakanyan Minskdə Şərq Tərəfdaşlığına üzv ölkələrin xarici işlər nazirlərinin görüşündə iştirak edirlər.

Tədbir çərçivəsində iki nazir qeyri-rəsmi şəraitdə söhbət edib, bu barədə Ermənistan KİV-ləri məlumat yayıb və fotoşəkil dərc edib.

Görüşdə çıxış edən Ermənistan naziri bildirib ki, Dağlıq Qarabağın statusu və təhlükəsizliyi Ermənistan üçün əsas prioritetlərdir.

Onun sözlərinə görə, dialoqa şərait yaradan atmosferin təmin edilməsi danışıqlar prosesinin səmərəliliyi üçün böyük əhəmiyyət kəsb edir.

Qarabağda təmas xəttində və Ermənistan və Azərbaycan sərhədində gərginlik, hərbi ritorika, insanlar arasında əlaqələrə maneçilik aradan qaldırılmalıdır, deyə Mnatsakanyan bildirib. O, həmçinin regionda silahlanmanın təşviqindən yayınmağa çağırıb.

Öz növbəsində, Elmar Məmmədyarov bildirib ki, Qarabağ münaqişəsi "Şərq Tərəfdaşlığı" çərçivəsində əməkdaşlığa ciddi ziyan vurur.

"Ermənistan ilk növbədə öz qoşunlarını Azərbaycanın işğal edilmiş ərazilərindən çıxarmalıdır. İşğalın davam etməsi regionda sülh və təhlükəsizlik üçün ciddi təhdid yaradır. Ermənistanın xarici işlər naziri sülhdən danışırsa, Ermənistan öz qoşunlarını Azərbaycanın işğal edilmiş ərazilərindən çıxarmalıdır", deyə o qeyd edib. -02D-