Azərbaycan və Gürcüstan strateji tərəfdaşlığı genişləndirmək niyyətindədir

Bakı/05.05.21/Turan: Azərbaycan və Gürcüstan xalqları arasında münasibətlər çoxəsrlik mehriban qonşuluq və dostluq tarixinə əsaslanır və bu, böyük dinamika nümayiş etdirən indiki münasibətlərin inkişafı üçün çox yaxşı zəmindir. Bu barədə Azərbaycan prezidenti İlham Əliyev Gürcüstanın baş nazirilə bugünkü görüşündə bildirib.

İki ölkə arasında birgə enerji və nəqliyyat layihələrinin reallaşdırılmasına toxunan Əliyev qeyd edib ki, onlar "regionun siyasi, iqtisadi, nəqliyyat və enerji xəritəsini dəyişiblər".

"Ölkələrimizin möhkəm tərəfdaşlığı olmadan bu layihələrin həyata keçirilməsi mümkün olmazdı", - o qeyd edib  və əlavə edib ki, 2020-ci ilin sonunda daha bir layihə - "Cənub” qaz dəhlizi işə salınıb.

"Bu layihə təkcə Cənubi Qafqaz üçün deyil, ümumi inkişaf, sabitlik və əməkdaşlıq baxımından bütün Avrasiya regionu üçün vacibdir. Ona görə də mən bu mühüm layihəni daim dəstəklədiyinə görə Gürcüstan hökumətinə dərin minnətdarlığımı bildirirəm. Birlikdə başladığımız bütün digər təşəbbüslər yaxşı bir uğur tarixçəsinə malikdir. Əminəm ki, bundan sonra da belə olacaq", - Əliyev vurğulayıb və xatırladıb ki, Azərbaycan Gürcüstan iqtisadiyyatında ən iri investorlardan biridir.

"Bu da əlverişli investisiya mühitinin yaxşı göstəricisidir. Mən bilirəm ki, Azərbaycan şirkətlərinin çoxu sizin ölkədə çalışmaq istəyir və əminəm ki, belə də olacaq", - Əliyev deyib.

Öz növbəsində, Gürcüstanın baş naziri Tvitter hesabında yazıb: "Bu gün mən Azərbaycan prezidenti İlham Əliyevlə əla görüş keçirdim". Onun sözlərinə görə, görüşdə strateji tərəfdaşlıq məsələləri müzakirə olunub.

"Biz qarşılıqlı maraq doğuran mövzular, münaqişələrin dinc yolla həllinin vacibliyi, iqtisadi, enerji və ticarət sahələrində əməkdaşlığın inkişaf etdirilməsi, regional layihələrin həyata keçirilməsi ilə bağlı müzakirələr apardıq", - Qaribaşvili bildirib. – 06B-