Azərbaycan və Qırğızıstan arasında əməkdaşlıq məsələləri müzakirə olunub

Bakı/15.08.22/Turan: Prezident İlham Əliyev və baş nazir müavini Bakıt Torobayev Azərbaycan-Qırğızıstan əməkdaşlığının inkişafı məsələlərini müzakirə ediblər. 

Ölkədə şaxələndirilmiş nəqliyyat infrastrukturunun yaradıldığını qeyd edən Əliyev Azərbaycanın beynəlxalq nəqliyyat potensialına digər ölkələrin, o cümlədən Mərkəzi Asiya ölkələrinin getdikcə daha böyük maraq göstərdiyini bildirib. O, eyni zamanda Mərkəzi Asiya regionunda da Xəzər dənizi hövzəsinə çıxan yeni dəmir yolu şəbəkələrinin yaradılması ilə bağlı planların da əhəmiyyətini vurğulayıb.

Bakıt Torobayev, öz növbəsində, kənd təsərrüfatı, energetika, investisiyalar, təhsil sahəsində əməkdaşlığa maraq göstərdiklərini qeyd edib. Bu məsələlər Azərbaycan Respublikası ilə Qırğız Respublikası arasında iqtisadi və humanitar sahələrdə əməkdaşlıq üzrə birgə hökumətlərarası komissiyanın Bakıda keçiriləcək iclasında müzakirə olunacaq.

Torobayev həmçinin Əliyevi Qırğızıstana rəsmi səfərə dəvət edib. -02D-