Azərbaycan və Slovakiya ticarət əlaqələrinin inkişafında maraqlıdır

Bakı/17.03.21/Turan: Slovakiyanın xarici işlər naziri İvan Korçok Azərbaycanda səfərdədir. Bu gün, martın 17-də onun prezident İlham Əliyev və xarici işlər naziri Ceyhun Bayramovla görüşü olub. Görüşlər zamanı siyasi əlaqələr, iqtisadi əməkdaşlıq, ticarət əlaqələrinin genişləndirilməsi, minalardan təmizləmə sahəsində əməkdaşlıqla bağlı məsələlər müzakirə edilib, dövlətlərin ərazi bütövlüyü və suverenliyi, sərhədlərin toxunulmazlığı prinsiplərinin dövlətlərarası münasibətlərdə aliliyi qeyd olunub.

“Slovakiya üçün ərazi bütövlüyü önəmlidir. Bu, xarici siyasət strategiyamızda əksini tapıb və Azərbaycana münasibətdə də belədir”, deyə İvan Korçok xarici işlər naziri Ceyhun Bayramovla görüşündən sonra keçirilən mətbuat konfransında bildirib.

Onun firkincə, Dağlıq Qarabağ münaqişəsinin həllindən sonra hər iki icmanın sülh şəraitində yaşamasını təmin etmək önəmlidir. Nazir Slovakiyanın etimad yaratma tədbirlərində iştirak etməkdə maraqlı olduğunu deyib.

O qeyd edib ki, regionda əməkdaşlığı keçmiş əlaqələr üzərində davam etdirmək istəyirlər.

“Prezident İlham Əliyevə təşəkkür edirik, çox faydalı görüşümüz oldu. Biz regiondakı, Qarabağdakı vəziyyəti nəzərdən keçirdik”.

Korçok qeyd edib ki, Ceyhun Bayramovla görüşdə ikitərəfli münasibətlər də müzakirə olunub. Onun fikrincə, Slovakiya və Azərbaycan arasında iqtisadi əlaqələr qaneedici sayıla bilməz.

“Slovakiyada çoxsaylı avtomobillər istehsal edir. Eyni zamanda, Slovakiyada “ağıllı şəhərlər” yaradan startap layihələri həyata keçirilir. Bu sahədə Azərbaycanla əməkdaşlıq edə bilərik”.

O hesab edir ki, Azərbaycanla Avropa İttifaqı arasında əməkdaşlıqla bağlı yeni sazişin imzalanması vacibdir və Slovakiya bu sahədə Azərbaycana dəstək verəcək.

Ceyhun Bayramov deyib ki, görüş zamanı ikitərəfli və çoxtərəfli platformalarda münasibətlər və əməkdaşlıq məsələlərini müzakirə ediblər.

Nazir ölkələr arasında siyasi dialoqu yüksək qiymətləndirib.

“Bu dialoqu davam etdirməyi zəruri saydıq. Bu xüsusda Slovakiyanın xarici və Avropa işləri naziri İvan Korçokun Azərbaycana səfərini dəyərli töhfə hesab edirik. 2019-cu ildə Slovakiyanın Azərbaycanda səfirliyi təsis edilib. Bu amili ikitərəfli münasibətlərin inkişafı baxımından yüksək dəyərləndiririk”.

Bayramov qeyd edib ki, qarşılıqlı sərmayə və ölkələr arasında ticarət dövriyyəsi qaneedici deyil.

Nazir vurğulayıb ki, slovakiyalı həmkarı ilə keçirilən görüşdə energetika, mədəniyyət və elm sahələrində iş birliyinin genişləndirilməsi məsələlərinə də toxunulub.

Həmçinin slovakiyalı nazir Azərbaycan xarici işlər nazirini ölkəsinə səfərə dəvət edib. -03-