Azərbaycan Xalq Cəbhəsi Partiyası Niyaməddin Əhmədovun həbsini siyasi qisasçılıq sayır

Bakı/19.05.20/Turan: 15 aprel 2020 ci il tarixdə güya karantin qaydalarını pozduğu üçün saxlanılan və 30 gün inzibati həbs alan AXCP fəalı və partiya sədri Əli Kərimlinin mühafizəçisi Niyaməddin Əhmədov barədə qondarma cinayət işi açılıb. İnzibati həbsdə olduğu müddətdə onu inzibati saxlama yerindən DTX-ya apararaq işgəncə vermiş və AXCP sədri Əli Kərimli o cümlədən başqa  partiya üzvləri haqqında yalan ifadələr verməyə məcbur etmişdilər. 

10 gün DTX da saxlanılandan sonra 9 may tarixində yenidən DİN inzibati həbs olunanların saxlanma məntəqəsinə gətirilsə də həbs müddəti bitdikən sonra azadlığa buraxılmamışdır. 

3 gün axtarışdan sonra məlum olub ki, Niyaməddin Əhmədova Cinayət Məcəlləsinin DTX-da 214-1 maddəsi ilə cinayət işi açılıb. AXCP bəyan edir ki, 30 illik siyasi tarixində bir dəfə də olsun zorakı metodlardan istifadə etməmiş təşkilatın  üzvünə bu ittiham (terrorçuluğu maliyyələşdirmə) absurddur, yol verilməzdir, hüququn ayaq altına atılmasıdır, siyasi qisasçılıqdır. 

Niyaməddin Əhmədov məhz 19 oktyabr mitinqində Əli Kərimlini sona qədər müdafiə etdiyi üçün cəzalandırılır. 

AXCP nəinki bu ittihamları rədd edir, eyni zamanda tələb edir ki, dövlət səviyyəsində hüquqsuzluğa və zorakılığa bir an öncə son qoyulamlıdır. Xalq Cəbhəsi bütün vicdanlı vətəndaşları, ölkə və dünya ictimaiyyətini bu gənc və günahsız siyasi fəalın müdafiəsinə çağırır.

Bəyanatı AXCP Rəyasət heyəti qəbul etmiş, mətbuat xidməti yaymışdır.-0-