Azərbaycan Xarici İşlər Nazirliyi dünya birliyini erməni vandalizminə reaksiya verməyə çağırıb

Bakı/17.10.22/Turan: Azərbaycan Xarici İşlər Nazirliyi son günlər sosial şəbəkələrdə radikal ermənilər tərəfindən Azərbaycan qəbiristanlığının dağıdılması ilə bağlı yayılan videogörüntüləri şərh edib.

“Bu videolarda təhqiramiz ifadələrlə azərbaycanlıların qəbirlərinə qarşı vandalizm aktları törədilir, qəbir daşları yük maşını ilə dağıdılır. Bu görüntülər Ermənistan tərəfindən uzun illər ərzində həyata keçirilən Azərbaycan irsinin məhv edilməsi siyasətinin növbəti bariz nümunəsidir”, -Azərbaycan Xarici İşlər Nazirliyinin şərhində deyilir.

Ermənistan ərazisində tarixən məskunlaşan azərbaycanlılara məxsus tarixi,mədəni, dini irsi məqsədyönlü şəkildə məhv edilib, 30 ilə yaxın işğal altında saxladığı Qarabağ və ətraf rayonlarda da misli görünməmiş dağıntılar törədib.

“Azərbaycan ərazisində qeyri-qanuni məskunlaşan, hətta hərbi əməliyyatlardan sonra Azərbaycan ərazisini tərk edən erməni əhali infrastruktura, abidələrə, ətraf mühitə ziyan vurub”, - məlumatda deyilir.

Təəssüf ki, Ermənistan 30 illik işğal dövründə YUNESKO missiyasının bölgəyə səfərinin qarşısını alıb.  

Azərbaycan YUNESKO-nun missiyasını dəvət etsə də, Ermənistanın destruktiv mövqeyi ucbatından səfər hələ də baş tutmayıb.

“Yayılan videogörüntülər Ermənistanın beynəlxalq missiyanın regiona səfərində niyə maraqlı olmadığını açıq şəkildə göstərir. Radikal ermənilərin törətdiyi bu vandalizm aktları kövrək postmünaqişə mərhələsində iki dövlət arasında normallaşma prosesinə zərbədir.

Azərbaycan tərəfi  azad olunmuş ərazilərdə böyük dağıntılarla bağlı  videogörüntüləri toplayır, sənədləşdirir və Ermənistan tərəfin cavab verməsi üçün müvafiq addımlar atılır.

Beynəlxalq ictimaiyyət Ermənistan tərəfindən yalnız Azərbaycanın deyil, eləcə də bəşəriyyətin irsinə qarşı törədilən vəhşiliklərlə bağlı susmamalıdır”- Azərbaycan Xarici İşlər Nazirliyinin şərhində deyilir.

Qeyd edək ki, ötən gün sosial şəbəkələrdə ermənilərin yük maşınından istifadə edərək Azərbaycan qəbiristanlığında abidələri dağıtdığını əks etdirən videogörüntülər yayılıb. Bunun Xankəndidə baş verdiyi bildirilib. Vandalizm aktları mərhumların ünvanına ermənicə söyüşlə müşayiət olunur. 06B