Azərbaycan Xarici İşlər Nazirliyi: Ermənistanın xarici diplomatların Şuşa şəhərinə səfərinə etiraz etməyə haqqı yoxdur

Bakı/14.07.21/Turan: Azərbaycan Xarici İşlər Nazirliyində Azərbaycanda akkreditə olunan səfirlərin Şuşaya səfərilə bağlı Ermənistan Xarici İşlər Nazirliyinin həmin dövlətlərin diplomatik missiya rəhbərlərini dəvət edərək onlara etiraz notası təqdim etməsini absurd adlandırıblar.

Ermənistanın bu addımı bir daha onu göstərir ki, bu ölkə hələ də beynəlxalq hüquqa zidd olan və ərazi iddialarından çıxış edən mövqe sərgiləyir, Azərbaycan Xarici İşlər Nazirliyinin rəsmi nümayəndəsi Leyla Abdullayeva bildirib.

“Bir daha vurğulayırıq ki, Azərbaycanın beynəlxalq sərhədləri çərçivəsindəki ərazisinə edilən hər hansı səfər Ermənistan tərəfindən nəinki etiraz, heç şərh belə oluna bilməz. Bu ərazilərə səfərlər Ermənistanın hərbi işğalı altında olan zaman qanunsuz xarakter daşıyırdı. Artıq Şuşa azad olunub, digər azad olunan bölgələrimiz kimi Azərbaycanın tərkib hissəsidir”, - o qeyd edib.

Abdullayeva deyib ki, hazırda Qarabağda bərpa işləri aparılır.

“Bura səfərlər də edilir və ediləcək, bərpa işləri də həyata keçirilir, şəhərin qanuni sahibləri öz evlərinə geri qayıdacaq, bir sözlə mədəniyyət beşiyimizdə həyat yenidən canlanacaq”, - o deyib.

O, qeyd edib ki, Yerevanın etiraz etməsinə əsas yoxdur.

“Görünür, Ermənistan Xarici İşlər Nazirliyində rəhbərliyin olmaması bu qurumun tərtib etdiyi sənədlərə də öz təsirini göstərir.

Rəsmi Yerevan artıq bölgədəki yeni vəziyyəti qəbul etməlidir və anlamalıdır ki, beynəlxalq hüquqa zidd və destruktiv siyasətdən çıxış etmək Ermənistana yaxşı heç nə vəd etmir”, - Leyla Abdullayeva deyib.–06D-