Azərbaycan Xarici İşlər Nazirliyi: Fransa Ermənistanın təxribatlarına göz yumur və Azərbaycanı əsassız ittiham edir

Bakı/28.07.23/Turan:  Azərbaycan Xarici İşlər Nazirliyi "Laçın yolunun blokadası" ilə bağlı iyulun 27-də Fransanın Avropa və Xarici İşlər Nazirliyinin iddialarını rədd edib.

Azərbaycan Xarici İşlər Nazirliyinin rəsmi nümayəndəsi Ayxan Hacızadə öz şərhində "Laçın" sərhəd-keçid məntəqəsinin yaradılmasının Azərbaycanın üçtərəfli bəyanat çərçivəsində (10 noyabr 2020-ci il tarixli) öz öhdəliklərini pozması barədə Parisin fikirlərini rədd edib.

Eyni zamanda, Fransa üç il ərzində Ermənistan Silahlı Qüvvələrinin Azərbaycan ərazisində olmasını və Azərbaycana qarşı hərbi təxribatları görmür.

Fransa Xarici İşlər Nazirliyi Beynəlxalq Məhkəmənin qərarına istinad edir, lakin unudur ki, məhz məhkəmə  6 iyul tarixli qərarı ilə "Laçın" sərhəd- keçid məntəqəsinin tam legitimliyini təsdiqləyib, bu bəndin ləğvi və sərhədçilərin çıxarılması lə bağlı Ermənistanın tələbləri yekdilliklə qəbul edilməyib.

Azərbaycan tərəfi sərhəddə nəzarəti və şəffaflığı həyata keçirməyi, Laçın yolundan qanunsuz məqsədlər üçün istifadə olunmasının qarşısını almağı, yolda sui-istifadə hallarına yol verməməyi öhdəsinə götürür və bunları etməkdə səlahiyyətlidir.

Bu səylərə baxmayaraq, erməni tərəfi təxribatlardan əl çəkməyib, sərhəd məntəqəsinə atəş açıb, qaçaqmalçılığa cəhdlər edib və Azərbaycanın icazəsi olmadan yük maşınlarını əraziyə göndərməyə çalışıb, Hacızadə qeyd edib.

Bu təxribatlara baxmayaraq, Azərbaycan tərəfi Beynəlxalq Qırmızı Xaç Komitəsinin vasitəsilə erməni sakinlərin keçməsinə şərait yaradıb və təkcə bir gündə - iyulun 27-də "Laçın" sərhəd- keçid məntəqəsindən 34 nəfərin 7 nəqliyyat vasitəsilə keçməsi təmin edilib.

Buna baxmayaraq, əraziyə böyük həcmdə yüklərin daşınması üçün alternativ yollar, o cümlədən Ağdam-Xankəndi yolu təklif olunsa da, bu qərara göstərilən hörmətsizlik göstərir ki, humanitar fəlakət barədə bəyanatlar, sadəcə, spekulyasiyadır.

"Bütün bunların fonunda Fransa tərəfinin erməni təxribatlarını görməzdən gəlməsi və Azərbaycana qarşı qərəzli münasibəti Parisin siyasətinin səhv olduğunu göstərir.

Qərəzli bəyanatlar verməzdən əvvəl Azərbaycana qarşı bu cür bəyanatların nəyə xidmət etdiyini düşünməyə, onların regionda sülh və sabitlik işinə xidmət etmədiyini anlamağa çağırırıq", - Azərbaycan Xarici İşlər Nazirliyinin şərhində deyilir. 06B