Azərbaycan Xarici İşlər Nazirliyi: Paşinyanın iddiaları əsassız və təxribatyönlüdür, sülh prosesini pozmağa yönəlib

Bakı/03.08.23/Turan: Azərbaycanın Laçın yolunu bağlaması ilə bağlı Ermənistanın baş nazirinin iddiaları əsassızdır, onun Bakının ünvanına ittihamları tutarlı deyil, təxribatyönlüdür və iki ölkə arasında normallaşma prosesinin pozulmasına yönəlib. Bu barədə Ermənistanın baş naziri Nikol Paşinyanın bugünkü bəyanatı ilə bağlı Azərbaycan Xarici İşlər Nazirliyinin şərhində deyilir.

Bu gün hökumətin iclasında çıxış edən Paşinyan bildirib ki, Azərbaycan "Dağlıq Qarabağa humanitar yardımın daşınmasını əngəlləyir", Bakını sərhədlərin delimitasiyası prosesini pozmaqda ittiham edib və cinayət törətməkdə ittiham olunan və ya artıq məhkum edilmiş ermənilərin, o cümlədən iyulun 29-da saxlanılan Vaqif Xaçatryanın azad edilməsinə çağırıb.

"Avqustun 3-də hökumətin iclasında Ermənistanın baş naziri Nikol Paşinyanın Laçın sərhəd-keçid məntəqəsinin fəaliyyəti, habelə iki ölkə arasında sərhədin delimitasiyası və ərazi bütövlüyü məsələsində beynəlxalq birliyi yanlış məcraya yönləndirmək cəhdləri Ermənistan tərəfinin iki ölkə arasında normallaşma prosesinə müsbət töhfə vermək əvəzinə, vəziyyəti gərginləşdirmək niyyətinin göstəricisidir”, - Azərbaycan Xarici İşlər Nazirliyinin şərhində deyilir.

Azərbaycanın icazəsi olmadan Ermənistanın “humanitar yük” adı altında əvvəllər hərbi texnika və bir sıra digər qanunsuz daşınmalara cəlb olunmuş nəqliyyat vasitələrilə yük daşıması qəbuledilməzdir.

Laçın sərhəd- buraxılış məntəqəsinin fəaliyyəti Azərbaycan tərəfindən tənzimlənir və Ermənistanın son üç ilə yaxın dövrdə qanunsuz fəaliyyətlər üçün sui-istifadəni davam etdirdiyi Laçın yoluna girişə və çıxışa nəzarət üçün olduqca böyük əhəmiyyət daşıyır.

Beynəlxalq Ədalət Məhkəməsinin də 6 iyul tarixli qərarında bu sərhəd buraxılış məntəqəsinin aradan qaldırılması ilə bağlı müraciəti yekdilliklə rədd etməsi bir daha Ermənistan tərəfinin iddialarının əsassız olduğunu sübut edib.

Paşinyanın Azərbaycana qarşı ərazi iddialarını davam etdirməsi Ermənistanın 1991-ci il Almatı bəyannaməsi əsasında iki ölkənin sərhədlərinin delimitasiyası ilə bağlı əvvəllər verdiyi bəyanatlara sadiq olmadığını göstərir.

Həmçinin Xarici İşlər Nazirliyi Birinci Qarabağ Müharibəsində azərbaycanlı mülk əhaliyə qarşı hərbi cinayətlərlə əlaqədar axtarışda olan Vaqif Xaçatryanın sərhəd-keçid məntəqəsində saxlanılması ilə bağlı Azərbaycana qarşı ittihamların əsassız olduğunu qeyd edib.

“İnsanlıq əleyhinə cinayət törətmiş şəxs olan Vaqif Xaçatryanın həbsilə bağlı ictimaiyyəti yanlış yönləndirən Ermənistan tərəfinə bir daha xatırlatmaq istərdik ki, beynəlxalq humanitar hüquqda müharibə cinayətkarlarına qarşı müvafiq tədbirlər görülməsinə mane olan heç bir məhdudiyyət yoxdur. Bu şəxsin həbsi Azərbaycan qanunvericiliyi və beynəlxalq hüquq çərçivəsində həyata keçirilib. Ermənistan tərəfi 30 ilə yaxın işğal dövründə azərbaycanlılara qarşı soyqırım daxil, insanlıq əleyhinə cinayətlər və kütləvi qırğınlar törədilməsinə görə məsuliyyət daşıyan şəxsləri müdafiə etmək və onların əməllərini ört-basdır etmək əvəzinə, onların cinayət məsuliyyətinə cəlb edilməsi işinə dəstək verməlidir”, - nazirliyin şərhində deyilir.

“Ermənistan tərəfi həqiqətən də bölgədə sülh və sabitlikdə maraqlıdırsa, o cümlədən Azərbaycanın ərazi bütövlüyü və suverenliyini yalnız sözdə deyil, əməldə də dəstəkləyirsə, bu kimi təhrikçi addımlardan çəkinməli, Azərbaycan tərəfinin erməni sakinlərin ehtiyaclarının qarşılanması üçün təklif etdiyi “Ağdam-Xankəndi” yolundan və digər alternativ yollardan istifadəni dəstəkləməlidir. Ermənistan tərəfi həmçinin Azərbaycanın erməni sakinlərin reinteqrasiyası üzrə səylərinə maneçilik törətməməlidir”, - şərhdə vurğulanır.06В