Azərbaycan XİN başçısının Pakistanda görüşləri

Bakı/14.01.21/Turan: Azərbaycanın xarici işlər naziri Ceyhun Bayramov Pakistana rəsmi səfəri çərçivəsində yanvarın 14-də bu ölkənin prezidenti Arif Alvi ilə görüşüb, bu barədə Azərbaycan XİN-in mətbuat xidməti məlumat yayıb.

Prezident Arif Alvi Azərbaycan xalqını Dağlıq Qarabağın işğaldan azad edilməsi münasibətilə təbrik edib. O, regional münaqişələrin beynəlxalq hüquq prinsipləri əsasında həllinin əhəmiyyətini qeyd edib. Pakistan dövlət başçısı iqtisadi sahədə və digər sahələrdə ikitərəfli münasibətlərin uğurla inkişaf etdiyini qeyd edib.

Ceyhun Bayramov İkinci Qarabağ Müharibəsi zamanı Pakistanın nümayiş etdirdiyi dəstəyi vurğulayıb və buna görə təşəkkür edib. O, həmçinin qeyd edib ki, Azərbaycan Cammu və Kəşmir məsələsinin beynəlxalq hüquq norma və prinsipləri və BMT TŞ-nin qətnamələri əsasında həllini dəstəkləyir.

Azərbaycanın işğaldan azad edilmiş ərazilərində bərpa və reabilitasiya işlərinə toxunan Bayramov qeyd edib ki, dost ölkələrin bu fəaliyyətə cəlb oluna biləcəyini qeyd edib.

Elə həmin gün Bayramov Pakistan SQ Baş Qərargah rəisi Qamar Cavid Bacva ilə görüşüb.

Baş Qərargah rəisi Azərbaycanı Qarabağ müharibəsində Qələbə münasibətilə təbrik edib və Azərbaycanın ədalətli mövqeyinə tam dəstək ifadə edib.

Bayramov azad edilmiş ərazilərdə aparılan işlər və infrastrukturun bərpası haqqında məlumat verib. Tərəflər iki ölkə arasında hərbi-texniki və hərbi sahədə ikitərəfli əməkdaşlığın inkişafı məsələlərini müzakirə ediblər. -02D-