Azərbaycan XİN Ermənistan baş nazirinin son bəyanatı barədə

Bakı/13.02.19/Turan: "Məsələ Azərbaycanın "aqressiv ritorika"sında yox, Ermənistanın aqressiv hərəkətlərindədir", - Azərbaycan XİN-in rəsmi nümayəndəsi Leyla Abdullayeva Ermənistanın baş naziri Nikol Paşinyanın "Azərbaycan "aqressiv ritorika" tətbiq edir, əhalini sülhə yox, müharibəyə hazırlayır" bəyanatını şərh edərkən deyib.

Öz ərazilərinin 20%-nin işğal altında olmasına, bir milyon məcburi köçkünün olmasına baxmayaraq, Azərbaycan münaqişənin dinc nizamlanması üçün Ermənistanla danışıqlar aparır.

"Münaqişənin nizamlanması regiona sülh və inkişaf gətirəcək. Ermənistanın baş naziri bunu nə qədər tez başa düşsə, nizamlanmadan onun ölkəsinə konkret hansı faydanın olacağını anlasa, Ermənistan əhalisinə vəd etdiyi "iqtisadi inqilab"ı daha tez reallaşdıra bilər", -L.Abdullayeva bildirib.

O, Ermənistnın baş nazirini öz bəyanatları ilə vəziyyəti gərginləşdirməməyə, ATƏT-in Minsk Qrupu həmsədrlərinin son bəyanatlarında deyildiyi kimi, danışıqlar üçün zəmin yaratmağa çağırıb.

"Dağlıq Qarabağ və ona bitişik rayonlar Azərbaycanın beynəlxalq səviyyədə tanınmış və hazırda Ermənistan Silahlı Qüvvələrinin işğalı altında olan ayrılmaz hissəsidir. Beynəlxalq ictimaiyyət orada yaşayan erməni icmasının üzvlərini Azərbaycan vətəndaşları kimi tanıyır", - L.Abdullayeva vurğulayıb.-06D-