Azərbaycan XİN Ermənistan XİN başçısının Dağlıq Qarabağa səfərini pisləyib

Bakı/06.01.21/Turan: “Ermənistan xarici işlər naziri Ara Ayvazyanın Azərbaycanın Qarabağ bölgəsinə qanunsuz səfəri və burada qondarma qurumun nümayəndələri ilə görüşlər keçirməsi və “sənədlər” imzalaması 10 noyabr tarixli üçtərəfli bəyanata ziddir və hərbi əməliyyatların dayandırılmasından sonra bölgədə sülh, təhlükəsizlik və əməkdaşlığın yaradılması çərçivəsinə tamamilə uyğun gəlmir”, bu barədə Azərbaycan XİN-in Ara Ayvazyanın Qarabağa düənki səfəri ilə bağlı şərhində deyilir.

“Ermənistan rəsmiləri bölgədə yaranmış yeni reallığı qəbul etməlidir. 10 noyabr tarixli birgə bəyanatın icrasının təmin olunması və bölgədə yaranmış yeni təhlükəsizlik formatı, eləcə də əməkdaşlıq imkanlarından çıxış edərək addımların atılması sülh və təhlükəsizlik şəraitində birgəyaşayışa töhfə verə bilər. Bunun əksi isə, gərginliyi alovlandırmaq cəhdindən başqa bir şey deyildir", deyə şərhdə qeyd edilir.

Ermənistan KİV-lərinin məlumatına görə, Ayvazyan Dağlıq Qarabağın “prezidenti” və “XİN başçısı” ilə görüşlər keçirib, iki tərəfin addımlarının “əlaqələndirilməsini” müzakirə edib. Həmçinin Ermənistan XİN və “Qarabağ XİN” arasında protokol imzalanıb. -02D-