Azərbaycan XİN Ermənistanı münaqişənin nizamlanması üzrə səylərə zərbə vurmaqda ittiham edib

Bakı/03.08.22/Turan: Azərbaycan XİN bu gün səhər Laçın istiqamətində baş verən silahlı insidentə və Azərbaycan əsgəri Anar Kazımovun ölümünə görə məsuliyyəti Ermənistanın üzərinə qoyur.

XİN-in şərhində xatırladılır ki, Azərbaycan tərəfi dəfələrlə Ermənistanın 10 noyabr 2020-ci il tarixli üçtərəfli bəyanatla üzərinə götürdüyü öhdəlikləri yerinə yetirmədiyini və qanunsuz erməni silahlı dəstələrinin hələ də Azərbaycan ərazisindən çıxarılmadığını bəyan edib.

"3 avqust tarixində baş vermiş qanlı insident bir daha Ermənistanın üçtərəfli razılaşmanı kobud şəkildə pozduğunu, eyni zamanda iki dövlət arasında münasibətlərin normallaşması istiqamətində səylərə xələl gətirdiyini nümayiş etdirir. Bu, həmçinin Ermənistanın beynəlxalq vasitəçilərin səylərinə hörmətsizliyinin göstəricisidir", deyə Azərbaycan XİN-in məlumatında bildirilir.

"Azərbaycan ərazisində baş verən insidentin bütün məsuliyyəti qonşu dövlətin torpaqlarında qanunsuz silahlı birləşmələrini hələ də çıxarmayan Ermənistanın siyasi və hərbi rəhbərliyinin üzərindədir.

Azərbaycan ərazilərinin təhlükəsizliyi, sərhədlərinin bütövlüyünün təmin edilməsi üçün tərəfimizdən bütün müvafiq tədbirlər bundan sonra da davam etdiriləcəkdir", deyə XİN-in şərhindəq eyd edilir. 06B