Azərbaycan XİN Tehrana etirazını bildirib

Bakı/16.04.20/Turan: Dünən Azərbaycan xarici işlər nazirinin müavini Xələf Xələfovla İranlı həmkarı Abbas Əraqçi və bu ölkənin Bakıdakı səfiri Cavad Cahangirzadə arasında telefon danışıqları baş tutub.

Azərbaycan XİN-in mətbuat xidmətinin məlumatına görə, söhbət zamanı Xələfov son günlər Ermənistan mətbuatında İran dövlət nömrə nişanlı yük avtomobillərinin Azərbaycanın işğal olunmuş ərazilərinə yanacaq, xammal və ərzaq daşımaları barədə məlumat və videogörüntülərin Azərbaycan Hökumətinin ciddi narahatlığına və ictimaiyyətin dərin narazılığına səbəb olduğunu vurğulayıb. Onun sözlərinə görə, belə halların baş verməsi işğalçı Ermənistana dəstəyə  və münaqişənin şiddətlənməsinə xidmət edir. Nazir müavini Azərbaycan XİN-in İran tərəfin araşdırma aparacağına və bu məsələyə aydınlıq gətirəcəyinə ümidvar olduğunu bildirib.

İranın nazir müavini, öz növbəsində, videogörüntüləri yalan məlumat adlandırıb. Əraqçi "İran-Azərbaycan mehriban dost münasibətlərinin düşmənlərinin mövcudluğundan" gileylənib, həmin qüvvələrin mütəmadi olaraq bu cür məlumatları ortaya ataraq iki tərəfli münasibətlərimizə xələl gətirməyə çalışdıqlarını vurğulayıb.

Qeyd edək ki, söhbət Qarabağda yerli blogerlərdən birinin çəkdiyi reportajdan gedir. Blogerin gözləri qarşısında İranın onlarla yük maşını Qarabağa gəlir. -06D-