Azərbaycana xatırladılıb ki, aviasiya sazişilə bağlı təklif edilən imkanlar əbədi deyil

Bakı/19.02.19/Turan: Azərbaycan təmsilçiləri başa düşməlidir ki, yaradılan imkanlar əbədi deyil. Bu barədə Avropa Komissiyasının nəqliyyat və hərəkətlilik üzrə baş direktoru Henri Hololey çərşənbə axşamı brifinqdə aviasiya sazişi ilə bağlı danışıqların gedişini şərh edərkən deyib.

Onun sözlərinə görə, Bakıda danışıqlar zamanı o, Azərbaycanın aviasiya sazişində maraqlı olduğunu qeyd edib və danışıqların növbəti mərhələsi gələn ay olacaq.

"Zənnimcə, ilin sonunadək bu saziş imzalana bilər. Hesab edirəm ki, iradə olarsa, problemin həlli yolu tapılar", - o deyib.

Aİ və Azərbaycan arasında "açıq səma"nı nəzərdə tutan aviasiya sazişinin müzakirəsi 2013-cü ildə başlanıb və sonradan dayandırılıb. 2017-ci ildə Aİ yenidən Azərbaycana müqavilə ilə bağlı danışıqlar aparmağı təklif edib. Tərəflər tezliklə müqavilənin imzalanacağını bəyan etsələr də hələlik danışıqlar başa çatmayıb. Azərbaycandakı tənqidçilər AZAL-ı monopolist siyasətdən əl çəkməyərək Avropanın kiçik büdcəli aviaşirkətlərini ölkəyə buraxmaq istəməməkdə ittiham edirlər. Onlar hesab edirlər ki, məhz şirkət rəhbərliyi aviasiya sazişi ilə bağlı danışıqların gedişini ləngidir.-71D