Azərbaycanda Avropa Günü-2022-nin proqramı

Bakı/05.05.22/Turan: COVİD-19 pandemiyası ilə əlaqədar verilən iki illik fasilədən sonra Aİ-nin Azərbaycandakı nümayəndəliyi mayın 9-da qeyd olunan Avropa Gününə həsr edilmiş ictimai tədbirlər keçirəcək.

Mayın 4-də keçirilən mətbuat konfransında Aİ Nümayəndəliyinin sədri Peter Mixalko tədbirin proqramı haqqında məlumat verib. 

Belə ki, mayın 12-də ADA Universitetində "Aİ-Azərbaycan - güclü tərəfdaşlıq" mövzusunda debat və seminarlar keçiriləcək. Gənclərin Aİ ölkələrinin səfirləri ilə müxtəlif əməkdaşlıq istiqamətlərinə həsr olunmuş görüşləri keçiriləcək.

Mayın 14-də Dənizkənarı Bulvarda "Avropa Şəhərciyi" adlı tədbir keçiriləcək. Tədbirdə Avropa Mədəniyyəti və ənənələri təqdim ediləcək. Tədbirdə eyni zamanda Aİ-nin layihələri, o cümlədən ERASMUS+ təhsil proqramı təqdim ediləcək.

"Avropa Şəhərciyi" saat 11.00-da Panoramik Karuselin qarşısındakı meydanda açılacaq.

Elə həmin gün axşam saat 18:00-da Azərbaycanlı ifaçılar Dilarə Kazımova, Ülviyyə Rəhimova, Yelena Namazova və başqalarının iştirakı ilə konsert başlayacaq.

Mayın 17-də Fairmont otelində Aİ-Azərbaycan biznes forumu keçiriləcək. "Bu, Aİ və Azərbaycan arasında iqtisadi əməkdaşlığın genişləndirilməsinə, münasibətlərin qurulmasına, təcrübə mübadiləsinə, iqtisadiyyatın və təhsilin şaxələndirilməsinə yönəlmiş beynəlxalq tədbirdir", deyə Mixalko bildirib. 

Elə həmin tədbirdə "2021-ci ildə Azərbaycanda biznes mühiti" adlı hesabat təqdim ediləcək. -06В-