Azərbaycanda İkinci Dünya Müharibəsi iştirakçılarına birdəfəlik yardım veriləcək

Bakı/29.04.21/Turan: Prezident İlham Əliyev bu gün imzaladığı sərəncama əsasən 1941–1945-ci illərdə İkinci Dünya Müharibəsində iştirak etmiş şəxslərə 1500 manat məbləğində, İkinci Dünya Müharibəsində həlak olmuş və ya sonralar vəfat etmiş döyüşçülərin dul arvadlarına, həmin dövrdə arxa cəbhədə fədakar əməyinə görə orden və medallarla təltif edilmiş şəxslərə, İkinci Dünya Müharibəsi illərində döyüş cəbhələrinin arxa hüdudları, yaxud döyüşən donanmaların əməliyyat zonaları daxilində ordunun və donanmanın mənafeyi üçün tapşırıqları yerinə yetirmiş xüsusi birləşmələrin işçilərinə, İkinci Dünya Müharibəsi dövründə Leninqrad şəhərinin müdafiəsinə görə müvafiq medal və döş nişanı ilə təltif edilmiş şəxslərə, habelə Leninqrad şəhərinin mühasirəsi iştirakçılarına 750 manat məbləğində birdəfəlik maddi yardım veriləcək.

Bununla əlaqədar, Azərbaycan prezidentinin 2021-ci il dövlət büdcəsində nəzərdə tutulmuş ehtiyat fondundan 4,8 milyon manat vəsait ayrılacaq.

İkinci Dünya Müharibəsində Azərbaycandan keçmiş SSRİ ordusunun tərkibində 681 min adam iştirak edib. Onlardan 300 mindən çoxu döyüşlərdə həlak olub.

Hazırda ölkədə İkinci Dünya Müharibəsində iştirak etmiş bir neçə yüz nəfərin qaldığı güman edilir.-03-