![Azərbaycanda parlament seçkiləri keçirilir](https://turan.az/resized/media/2020/main/020900024407-750-500-resize.webp)
Azərbaycanda parlament seçkiləri keçirilir
Bakı/09.02.20/Turan: Bazar günü Azərbaycanda parlament seçkiləri keçirilir. Ölkə vətəndaşları Milli Məclisə 125 deputat seçirlər.
Saat 8.00-da 5573 seçki məntəqəsi açılıb, 5 milyon 329 min 460 seçici burada səs verə biləcək.
Parlamentdəki 125 yer uğrunda 1314 namizəd mübarizə aparır, onlardan 79 faizi kişilər, 21 faizi qadınlardır. Bu barədə ötən gün MSK rəhbəri Məzahir Pənahov mətbuat konfransında bildirib.
Ümumilikdə seçkilərdə iştirak etmək üçün 2431 nəfər müraciət edib.
Onlardan 1637 namizəd qeydə alınıb. Ancaq sonradan 321 nəfər namizədliyini geri götürüb. Daha iki namizədin ikili vətəndaşlığı müəyyən olunduğu üçün qeydiyyatı MSK tərəfindən ləğv edilib. Beləliklə, namizədlərin sayı 1314-ə enib.
Onların arasında 19 siyasi partiyanın nümayəndələri var.
Namizədlərin əksəriyyəti Yeni Azərbaycan Partiyasını təmsil edir -123 namizəd.
Müxalifət qüvvələri arasında Müsavat Partiyasının ən çox namizədi var - 64 (həm partiya namizədləri, həm də özü namizədliyini irəli sürənlər olmaqla).
Respublikaçı Alternativ Partiyası (dövlət qeydiyyatı yoxdur) və bir qrup müstəqil namizəd tərəfindən yaradılan Real Cümhuriyyətçilər İttifaqının 30 namizədi var. “Nida” və “D18” hərəkatları və bir qrup müstəqil fəal tərəfindən yaradılan “Hərəkat” blokunun qeydə alınmış 16 namizədi var.
Parlament seçkilərini müşahidə etmək üçün 77790 yerli, 883 beynəlxalq müşahidəçi akkreditə edilib.
1000 məntəqədə veb-kameralar quraşdırılıb.
Seçkilərdə kvorum yoxdur. Ən çox səs toplayan namizəd qalibdir. Səsvermə saat 19.00-da başa çatacaq.
Səsvermənin nəticələri barədə ilkin məlumatlar fevralın 9-da axşam “Seçkilər” informasiya sistemi vasitəsilə məlum olacaq. –06D-
Siyasət
-
Azərbaycan Mərkəzi Seçki Komissiyasının məlumatına görə, saat 10.00-a olan məlumata görə, növbədənkənar parlament seçkilərində seçici fəallığı 9,92 faiz təşkil edib.
-
“Müsavat” partiyası seçki məntəqələrində “karusel” əməliyyatının kütləvi hal aldığını bəyan edib. Partiyann press-relizinə əsasən, 17 saylı seçki dairəsinin 24 saylı məntəqəsində hətta Bakı şəhərində deyil, respublikanın rayonlarında qeydiyyatda olan şəxslər səs verir. 8 saylı seçki dairəsinin 31 saylı məntəqəsində qeydiyyatda olmayan şəxslər müəyyən edilib.
-
Azərbaycan Prezidenti İlham Əliyev bu gün Serbiyanın xarici işlər naziri Marko Curiçi qəbul edib. Görüşdə Əliyev deyib ki, Serbiya Azərbaycanın dostu və strateji tərəfdaşıdır, - dövlət başçısının saytı xəbər verir.
-
Azərbaycan Respublikasının Prezidenti İlham Əliyev, birinci xanım Mehriban Əliyeva və qızları Leyla Əliyeva 7 saylı Səbail seçki dairəsinin Bakı şəhərindəki 6 nömrəli tam orta məktəbdə yerləşən 1 saylı seçki məntəqəsində səs veriblər, - deyə dövlət başçısının saytı xəbər verir.
Rəy yaz