Azərbaycanın dini konfessiya liderlərinin birgə bəyanatı

Bakı/16.10.20/Turan: Azərbaycanın dini konfessiyalarının liderləri bu gün Qarabağ münaqişəsi ilə bağlı birgə bəyanat qəbul ediblər.

Sənəddə deyilir ki, Qafqaz Müsəlmanları İdarəsi digər dini konfessiayalarla birgə  münaqişənin dini müstəviyə keçməməsi və problemin ədalətli həlli üçün səylərini əsirgəməyib.

Problemin həlli ilə bağlı Rusiya Pravoslav Kilsəsi, Ümumgürcüstan Patriarxlığı, Ermənistan Kilsələrinin nümayəndələri ilə müxtəlif vaxtlarda uzunmüddətli danışıqlar keçirilib. 

Sentyabrın 27-də hərbi əməliyyatlar başladıqdan bu yana QMİ Azərbaycanda fəaliyyət göstərən dini konfessiyalarla birgə Azərbaycan rəhbərliyinə dəstək ifadə edib. 

QMİ baş verən hadisələrin mahiyyətilə bağlı Gürcüstan, Rusiya dini rəhbəliyini, İslam ƏməkdaşlıqTəşkilatını, BMT Baş katibini məlumatlandırıb.

Ermənistan hakimiyyəti daim bu münaqişənin dini mahiyyət kəsb etdiyi yalanından əl çəkməyib və indi də əl çəkmir. Dini hisslərdən siyasi məqsədlər üçün sui-istifadə kimi olduqca təhlükəli meyli erməni tərəfi dini təəssübkeşlikdən dolayı dünya dövlətlərindən hərtərfəli dəstək almaq məqamı ilə zaman-zaman məkrlə, riyarkacasına qabartmaqdadır. 

Müraciət müəllifləri dünya dövlətlərinin başçılarını Ermənistan-Azərbaycan Dağlıq Qarabağ münaqişəsinin Azərbaycanın ərazi bütövlüyü çərçivəsində sülh yolu ilə həlli üçün səylərini əsirgəməməyə çağırırlar.

Bəyanatı QMİ sədri şeyxülislam Allahşükür Paşazadə, Rus Pravoslav Kilsəsinin Bakı Yeparxiyasının Arxiepiskopu Aleksandr ata, Dağ Yəhudiləri İcmasının sədri Milix Yevdayev, Azərbaycanda Avropa Yəhudiləri İcmasının rəhbəri Aleksandr Şarovski, Alban-Udin Kilsəsinin rəhbəri Robert Mobili imzalayıblar. -06D-