Azərbaycanlı jurnalist Gürcüstan hökumətindən Avropa İnsan Hüquqları Məhkəməsinə şikayət edib

Bakı/12.03.21/Turan:  Almaniyada mühacirətdə yaşayan jurnalist Əfqan Muxtarlı Gürcüstan hökumətindən Avropa İnsan Hüquqları Məhkəməsinə şikayət edib. Buna səbəb ölkəyə daxil olmaq imkanlsrından imtina edilməsidir. Bu barədə o,  Facebook səhifəsində yazıb.

Əfqan Muxtarlı qeyd edir ki, 2020-ci ilin oktyabrında pandemiya bəhanəsilə onu Tbilisiyə buraxmayıblar. "Ötən dəfə Gürcüstan parlamentinin spikeri Arçil Talakvadze bildirib ki, parlament seçkiləri öncəsi mənim səfərim siyasi qarşıdurmaya səbəb ola bilər. Əgər hakimiyyət mənim oğurlanmağıma cəlb edilməsəydi, mənə gəlməyə icazə verərdilər", - Əfqan Muxtarlı yazıb.

“Meydan” TV İnternet kanalı ilə əməkdaşlıq edən araşdırmaçı jurnalist Əfqan Muxtarlı 2017-ci ilin mayında Tbilisidə oğurlanıb və gizli şəkildə Azərbaycana göndərilib. Azərbaycanda onu qaçaqmalçılıq, sərhəddi qanunsuz keçmək və sərhədçiyə qarşı zorakılıqda ittiham edərək 6 il müddətinə azadlıqdan məhrum ediblər.

Avropa parlamenti, beynəlxalq hüquq-müdafiə təşkilatları Əfqan Muxtarlının həbsini pisləyiblər.  Amnesti İnterneşnl onu "vicdan məhbusu" kimi tanıyıb. Onun vəkilləri Gürcüstan və Azərbaycan hökumətindən Avropa İnsan Hüquqları Məhkəməsinə şikayət ediblər.

17 mart 2020-ci ildə məhkəmə Əfqan Muxtarlını vaxtından əvvəl azad edib, dərhal onu təyyarəyə mindirərək Almaniyaya yola salıblar.-0203B-