Bakı, Ankara və Tehran BMT Baş Assambleyasında Qüdslə bağlı vahid mövqedən çıxış edəcəklər (YENİLƏNİB)

Bakı/20.12.17/Turan: Bu gün Azərbaycan, İran və Türkiyə XİN başçılarının Bakıda keçirilən görüşündə ABŞ prezidenti Donald Trampın Qüdsə İsrailin paytaxtı kimi tanıması və Amerika səfirliyini bu şəhərə köçürməsi ilə bağlı vəziyyətə toxunulub. "Biz Fələstin və İsrail məsələsini müzakirə etdik. Bu məsələni də (Qüdsün İsrailin paytaxtı kimi tanınması - red.) müzakirə etdik və hesab edirik ki, bu məsələni belə hətt etmək olmazdı", deyə Azərbaycan XİN başçısı Elmar Məmmədyarov görüşün yekunlarına həsr olunmuş mətbuat konfransında bildirib.

Onun sözlərinə görə, hər üç nazir BMT Baş Assambleyasının dekabrın 21-də keçirilən fövqəladə iclasında bu məsələ ilə bağlı vahid mövqedən çıxış edəcəklər.

E.Məmmədyarov əlavə edib ki, Bakının bu məsələ ilə bağlı mövqeyini Azərbaycan prezidenti Türkiyədəki sammitdə səsləndirib. "İlham Əliyev ABŞ prezidentini öz qərarına yenidən baxmağa çağırıb. Rəsmi Bakı dəfələrlə Fələstin-İsrail münaqişəsinin nizamlanması ilə bağlı öz mövqeyini bildirib və bu mövqe dəyişməyib", deyə o qeyd edib.

Öz növbəsində, Türkiyə XİN başçısı Mövlut Çavuşoğlu qeyd edib ki, "ABŞ-ın qərarı səhvdir və Türkiyə fələstinli qardaşlarını dəstəkləyir".

M.D.Zərif də qeyd edib ki, Tehran "Vaşinqtonun Qüdslə bağl mövqeyini qəbul etmir". "Biz BMT Baş Assambleyasının sabahki iclasında Fələstin xalqının hüquqlarını müdafiə edəcəyik", deyə Zərif bildirib.

Baş Assambleyanın onuncu xüsusi fövqəladə iclasının (Qüdsün statusu ilə bağlı) 37-ci plenar iclası cümə axşamı keçiriləcək. -06D-

* * *

2017 Dekabr 20 (Çərşənbə) 13:23:58

Bakıda Azərbaycan, İran və Türkiyə XİN başçılarının görüşü başlayıb

Bakı/20.12.17/Turan: Bakıda Azərbaycan, İran və Türkiyə XİN başçıları - Elmar Məmmədyarov, Cavad Zərif və Mövlut Çavuşoğlunun beşinci görüşü başlayıb.

Nazirlər üçtərəfli əməkdaşlıq məsələlərini və regional məsələləri müzakirə edəcəklər. Görüşün yekunlarına görə bəyannamə qəbul ediləcək.

Bu, üç ölkənin XİN başçılarının bu formatda beşinci görüşüdür. -06D-