Bakı ilə Ankara Ukrayna və Qafqazda hərəkətlərini razılaşdırırlar

Bakı/05.03.22/Turan: Azərbaycan və Türkiyə beynəlxalq aləmdə razılaşdırılmış xarici siyasət yürüdürlər və öz addımlarını razılaşdırırlar. Bu barədə martın 5-də Bakıda iki ölkənin Xarici İşlər nazirliklərinin rəhbərləri Ceyhun Bayramov və Mövlud Çavuşoğlunun birgə mətbuat konfransında bildirilib.

Şənbə günü Ttrkiyəli nazir Azərbaycanın dövlət başçısı İlham Əliyevlə, daha sonra isə Ceyhun Bayramovla görüşüb.

Bayramov Çavuşoğlu ilə görüşün yekunlarına dair birgə mətbuat konfransında bildirib ki, danışıqların mövzusu Cənubi Qafqazda vəziyyət, Azərbaycanla Ermənistan arasında kommunikasiyaların açılmasının mümkünlüyü, Ermənistanla sərhədlərin delimitasiyası, Ermənistan-Türkiyə münasibətlərinin normallaşdırılması məsələləri olub.

O həmçinin qeyd edib ki, tərəflər qonşu ölkələrin iştirakı ilə üçtərəfli və dördtərəfli görüşlərin təşkilini müzakirə ediblər.

"Tezliklə üçtərəfli və dördtərəfli görüşlər təşkil ediləcək. Bu gün bu formatların hazırlanması məsələləri və yol xəritəsi müzakirə olunub", - Bayramov deyib, lakin Azərbaycan və Türkiyədən başqa hansı ölkələrdən söhbət getdiyini dəqiqləşdirməyib.

Görüşdə müzakirə olunan ikinci məsələ Ukraynada vəziyyət olub. "Bu hadisələr çox ciddi narahatlıq doğurur, Azərbaycan və Türkiyə münaqişənin həlli yollarının axtarışında çox fəaldırlar, Rusiya və Ukrayna liderləri ilə fəal təmasları dəstəkləyirlər. Ümid edirik ki, Moskva və Kiyev arasında aparılan danışıqlar nəticə verəcək", - Bayramov deyib.

Çavuşoğlu deyib ki, hər iki ölkə öz vətəndaşlarının Ukraynadan çıxarılması məsələsində əməkdaşlıq edir.

"Biz dövlətlərin sərhədlərinin zorla dəyişdirilməsinə qarşıyıq və biz Ukraynada müharibənin əleyhinəyik. Bu müharibənin dayandırılması üçün addımlar atırıq", - Çavuşoğlu qeyd edib.

Sonra o bildirib ki, Ermənistanla münasibətlərin normallaşdırılması istiqamətində atılan addımlar barədə Bakıya məlumat verib. Belə ki, Ermənistan, İsrail və Kipr də daxil olmaqla, 40 ölkənin lideri yüksək səviyyəli Antalya forumuna dəvət olunub.

Öz növbəsində Bayramov deyib ki, Bakı Ermənistan-Türkiyə münasibətlərinin normallaşmasını müsbət hesab edir.

"Biz də Ermənistana sülh müqaviləsi bağlamağı təklif edirik. Bu, Ermənistan üçün şansdır. Bu məsələdə Bakı və Ankara öz hərəkətlərini tamamən koordinasiya edirlər", - o vurğulayıb.

Ermənistanla danışıqlarımız Azərbaycanla razılaşdırılır. Ölkələrimizin məqsədi regionun sabitliyi və inkişafı, əlaqələrin və sülhün bərpasıdır.

Ukraynadakı Azərbaycan vətəndaşlarının taleyilə bağlı suala cavab verən Bayramov deyib ki, hazırda oradan 9500 Azərbaycan vətəndaşı və onların ailə üzvləri çıxarılıb. Onların vizasız tranzit keçişilə bağlı qonşu Avropa ölkələri ilə razılaşma var.

Bayramov həmçinin etiraf edib ki, atəş və bombardman zamanı Azərbaycan diasporu arasında həlak olanlar var.

Onun sözlərinə görə, Azərbaycan Ukraynaya ümumilikdə 5,5 milyon avro dəyərində humanitar və tibbi yük daşıyan iki təyyarə göndərib. -02B-