Bakı Ümumdünya Aeronaviqasiya Sammitini qəbul edəcək

Bakı/13.06.23/Turan: 2024-cü ilin iyun ayında Bakıda növbəti Ümumdünya Aeronaviqasiya Sammiti və CANSO-nun 28-ci İllik Ümumi İclası keçiriləcək.

AZAL aviaşirkətinin mətbuat xidmətindən verilən məlumata görə, bu barədə Berlində keçirilən CANSO sammitində elan verilib.

CANSO Beynəlxalq mülki aviasiya aeronaviqasiya təminatı provayderləri təşkilatıdır. Bu gün təşkilata 180-dən çox üzv, o cümlədən 2005-ci ildən üzv olmuş Azərbaycan daxildir.

Bakıda keçiriləcək sammitdə dünyanın 150 ölkəsini təmsil edən mülki aviasiya sahəsinin 350-dən çox rəhbərinin iştirakı gözlənilir. Onlar hava nəqliyyatının optimallaşdırılması və təhlükəsiz və dayanıqlı qlobal hava nəqliyyatı zəncirinin qurulmasında əməkdaşlığın ən aktual problemlərini müzakirə etmək üçün bir araya gələcəklər.

CANSO dünya hava trafikinin 85%-dən çoxunu əhatə edir və dünyanın hər yerindən aeronaviqasiya təminatı provayderlərini, aviasiya orqanlarının tənzimləyici və icra qurumlarını və aviasiya sahəsinin sənaye liderlərini birləşdirir. 06B