Bakı və Bişkek strateji tərəfdaşlıq barədə razılıga gəlib

Bakı/20.04.22/Turan: Çərşənbə günü Bakıda Azərbaycan və Qırğızıstan prezidentləri İlham Əliyev və Sadır Caparov ikitərəfli sənədlər imzalandıqdan sonra mətbuata bəyanatlarla çıxış ediblər.

Əliyev strateji tərəfdaşlıq haqqında bəyannamənin və Dövlətlərarası Şuranın yaradılmasına dair memorandumun imzalanmasını xüsusilə qeyd edib.

O deyib ki, strateji tərəfdaşlıq qarşılıqlı fəaliyyətin yüksək səviyyəsidir və bizi məhz strateji xarakterli əməkdaşlığa kökləyir. Dövlət başçısı diqqəti ona yönəldib ki, Qırğızıstan və Azərbaycan bütün beynəlxalq təşkilatlarda ənənəvi olaraq bir-birini dəstəkləyirlər.

Azərbaycan prezidentinin sözlərinə görə, danışıqlar zamanı ticari-iqtisadi sahəyə xüsusi diqqət yetirilib.

“Bu gün nəqliyyat infrastrukturunun, əsasən Şərq-Qərb nəqliyyat dəhlizinin daha səmərəli fəaliyyət göstərməsi üçün səylərimizi necə birləşdirəcəyimizlə bağlı məsələlər ətraflı müzakirə olundu”, - Əliyev deyib.   

Onun sözlərinə görə, Qırğızıstan iqtisadiyyatının energetika  sektoru da Azərbaycan şirkətlərinə maraqlı olardı.

Əliyev gələn il Şuşa şəhərinin türk dünyasının mədəniyyət paytaxtı elan olunması təşəbbüsünü dəstəklədiyinə görə Qırğızıstan liderinə təşəkkürünü bildirib.

Öz növbəsində Japarov beynəlxalq arenada qarşılıqlı əlaqənin, siyasi dialoqun möhkəmləndirilməsinin, iri investisiya layihələrinin birgə həyata keçirilməsinin, habelə humanitar əməkdaşlığın daha da genişləndirilməsinin vacibliyini vurğulayıb.06B-0-