Bakı Yerevanın iki ölkənin XİN başçılarının görüşü keçiriləcəyi barədə məlumatlarını təsdiq edib

Bakı/07.10.21/Turan: Azərbaycan post münaqişə dövründə Ermənistan-Azərbaycan münasibətlərinin normallaşdırılması istiqamətində məsələlərin müzakirəsini faydalı hesab edir. Bu barədə Azərbaycan XİN-in mətbuat katibi Leyla Abdullayevanın cümə axşamı verdiyi şərhdə deyilir.

“Biz post münaqişə dövründə Ermənistan-Azərbaycan münasibətlərinin normallaşdırılması istiqamətində məsələlərin müzakirəsini faydalı hesab edirik. Bir müddət öncə Nyu Yorkda iki dövlətin xarici işlər nazirlərinin görüşü baş tutub. Gələcəkdə də belə bir görüşün keçirilməsini istisna etmirik”, deyə Abdullayeva bildirib.

O, bu şərhin məhz nə ilə bağlı olduğunu açıqlamayıb, amma bu, Ermənistan XİN başçısı Mirzoyanın Azərbaycan XİN başçısı ilə ATƏT MQ həmsədrlərinin təşkilatçılığı ilə yeni görüş haqqında razılaşma əldə edildiyi barədə dünənki bəyanatına cavab olub.

Mirzoyan nazirlərin Nyu-Yorkda keçirilən görüşünün yekunlarını müsbət qiymətləndirib. “Əlbəttə, belə bir formatda müzakirələrin və danışıqlar prosesinin bərpası birmənalı olaraq Ermənistanın və Dağlıq Qarabağın maraqlarına uyğundur. Biz bir daha qeyd edirik ki, problem həll edilməyib. Beynəlxalq ictimaiyyət də bunu bildirir ki, problem mövcuddur və həllini tələb edir”, deyə Mirzoyan bildirib. -02D-