Bakıda MDB Baş Qərargah rəislərinin iclası keçirilir

Bazar ertəsi Bakıda MDB ölkələri Baş Qərargah Rəisləri Komitəsinin ikigünlük iclası açılıb. Bu, Baş Qərargah rəislərinin Bakıda keçirilən ilk iclasıdır. Bundan əvvəl 2001 və 2006-cı illərdə Bakıda MDB ölkələri Müdafiə Nazirləri Şurasının iclasları keçirilib.

İnterfaks agentliyi MDB Müdafiə Nazirləri Şurasının (MNŞ) katibi, general-leytenant Aleksandr Sinayskiyə istinadən bildirib ki, Bakı iclasında beş il müddətinə  tərəfdaşlıq münasibətləri konsepsiyasının təsdiqlənməsi planlaşdırılır.

İclas Rusiya Silahlı Qüvvələri Baş Qərargah rəisi, müdafiə nazirinin birinci müavini, ordu generalı Valeri Gerasimovun rəhbərliyi ilə keçiriləcək. V.Gerasimov həm də MDB qərargahları rəisləri komitəsinin sədridir.

A.Sinayski bildirib ki, komitə üzvləri yeni çağırışlara və təhdidlərə praktiki reaksiya məsələsinə, həmçinin müdafiə sahəsində əməkdaşlığın təkmilləşdirilməsi məsələsinə daha çox diqqət yetirəcəklər.

“Hazırda MDB Müdafiə Nazirləri Şurası hərbi-siyasi ittifaq deyil, regional təşkilat və əsas vəzifəsi mehriban qonşuluq və tərəfdaşlıq çərşivəsində tərəfdaşlıq münasibətlərinin möhkəmləndirilməsidir”, - A.Sinayski vurğulayıb.

* MDB SQ Qərargah Rəisləri Komitəsi 1996-cı il martın 27-də yaradılıb. Məqsəd MDB Baş qərargahlarının aktual hərbi əməkdaşlıq məsələləri üzrə fəaliyyətinin koordinasiyasıdır. Fəaliyyət üzrə ümumi rəhbərliyi MDB Müdafiə Nazirləri Şurası həyata keçirir.

MDB SQ Baş Qərargah rəislərinin əvvəlki iclası aprelin 5-də Astanada keçirilib.

Bakı iclası Ukrayna və Ermənistanın iştirakı olmadan keçiriləcək. Ukrayna Rusiyanın təcavüzü ilə əlaqədar MDB-də sədrliyi dayandırıb və bu təşkilatdan çıxmaq məsələsinə baxır.

Ermənistan iclasda iştirak edir. Belə ki, Ermənistan nümayəndə heyətinin qəbulu ilə bağlı Bakının təsdiq cavabını almayıb.

Beləliklə, iclasda beş ölkə: Azərbaycan, Belarus, Rusiya, Qazaxıstan, Qırğızıstan, Tacikistan iştirak edir.

Rusiyanın Yaxın Şərq və Qafqaz ölkələri problemləri üzrə rusiyalı ekspert Stanislav Tarasov Azərbaycanla Türkiyə arasında hərbi əməkdaşlığın intensifikasiyası ilə bağlı Moskvanın narahatlığını qeyd edir. Tarasovun fikrincə, bu, Gerasimov ilə Azərbaycan tərəfi arasında danışıqların predmeti ola bilər və Rusiya Bakını NATO ilə belə əməkdaşlıqdan çəkinməyə məcbur etmək üçün Qarabağ kartından istifadə edə bilər.

Bakıdakı mənbələr bildirirlər ki, general Gerasimovun Azərbaycanın təkcə hərbi yox, həm də siyasi rəhbərliyi ilə danışıqları gözlənilir. Lakin prezident İlham Əliyev Baş Qərargah rəisləri ilə görüşməyəcək, çünki Naxçıvanda yerləşən ordunun döyüş hazırlığı ilə tanış olmaq üçün bölgəyə ikigünlük səfər gedib.—0—