Bakıda və Yerevanda Lavrovun bəyanatına reaksiya

Bakı/16.01.18/Turan: Azərbaycan Rusiya XİN başçısı Sergey Lavrovun Qarabağ münaqişəsinin mərhələli həlli zərurəti haqqında bəyanatını alqışlayır, bu barədə Azərbaycan XİN-in mətbuat xidmətinin rəhbəri Hikmət Hacıyev Lavrovun bazar ertəsi 2017-ci ilin yekunlarına həsr olunmuş çıxışını şərh edərkən bildirib.

"Bu məsələni bir sənədlə birdəfəlik həll etmək mümkün deyil. Məsələyə mərhələli yanaşmaya ehtiyac var.. Bu mərhələli yanaşma indi nə etməyin mümkün olduğunu göstərəcək, münaqişənin yekun həlli və Dağlıq Qarabağın statusu ilə bağlı əlavə müzakirəyə ehtiyac olan yolları müəyyən edəcək. Yəni, hər şey münaqişə tərəflərindən asılıdır", deyə Lavrov bildirib.

Qeyd edək ki, Ermənistan tərəfi də Lavrovun sözlərinə reaksiya verib. Belə ki, Ermənistan XİN-in mətbuat katibi Tiqran Balayan hesab edir ki, Lavrov tərəfindən qeyd edilən mərhələli yanaşma Dağlıq Qarabağ münaqişəsinin paket şəklində həllini nəzərdə tutur.

"Söhbət mərhələli həyata keçirilən paket nizamlanmadan gedir, həmsədrlər dəfələrlə bu barədə, həmçinin təmas xəttindəki vəziyyətlə bağlı danışıblar. Biz bu bəyanatı alqışlayırıq. İnsidentlərin araşdırılması mexanizminin yaradılması və ATƏT-in hazırki sədrinin şəxsi nümayəndəsinin ofisinin imkanlarının artırılması barədə təkliflərin mahiyyəti məhz bundan ibarətdir", deyə Balayan Lavrovun bəyanatını şərh edərkən bildirib. -02D-