Bakıda “yaşıl energetika”nın inkişafı üzrə bəzi razılaşmalar əldə edilib

Bakı/04.02.23/Turan: Fevralın 3-də axşam “Cənub” Qaz Dəhlizi Məşvərət Şurasının 9-cu nazirlər iclası və yaşıl energetika üzrə  Məşvərət Şurasının 1-ci iclası çərçivəsində Azərbaycan Energetika Nazirliyi və ACWA Power şirkəti (Səudiyyə Ərəbistanı) bəzi  mühüm sənədlər imzalanıb.

“Dənizdə 1,5 QVt-dək külək layihəsinin həyata keçirilməsinə dair icra müqaviləsi”, “Quruda 1 QVt külək stansiyasının yaradılmasına dair anlaşma memorandumu” və  “Azərbaycan Respublikasında enerji saxlanc sistemlərinin inkişaf etdirilməsinə dair anlaşma memorandumu” imzalanıb.

“Bu gündən “ACWA Power” şirkəti ilə tərəfdaşlığımız ümumi gücü 2,5 QVt olan külək elektrik stansiyaları və ölkəmizdə ilk dəfə olaraq enerji saxlanc sistemlərinin yaradılması üzrə layihələrlə genişlənir”, - energetika naziri Pərviz Şahbazov bildirib. Onun sözlərinə görə, bu layihələr Azərbaycanın “yaşıl artım” ölkəsi və “yaşıl enerji” təchizaçısı kimi inkişafına dair dövlət siyasətinin həyata keçirilməsinə növbəti töhfələrdir.

“ACWA Power” ilə birgə fəaliyyətimiz Xəzərdən Avropaya planlaşdırılan yaşıl enerji dəhlizi üçün yeni gücləri təmin etməklə bərabər, karbon emissiyalarının azaldılması, enerji keçidinin sürətləndirilməsi üçün də əhəmiyyətlidir”, - o deyib.

Hazırda ACWA Power şirkətilə 240 MVt gücündə "Xızı-Abşeron" Külək Elektrik Stansiyasının tikintisi üzrə əməkdaşlıq aparılır.

Həmçinin fevralın 3-də Bakıda "Azərbaycan, Gürcüstan, Macarıstan və Rumıniya hökumətləri arasında yaşıl energetikanın inkişafı və təchizatı sahəsində strateji tərəfdaşlıq haqqında saziş"in həyata keçirilməsi üçün ilk nazirlər görüşü keçirilib.

"Yaşıl energetikanın Xəzər dənizindən Avropaya ötürülməsi ilə bağlı məsələlərin koordinasiyalı şəkildə həyata keçirilməsi üçün   İşçi Qrupunun yaradılması barədə razılıq əldə olunub. Görüşün sonunda yekun protokol imzalanıb", - qurumdan qedy ediblər.

Xəbər verildiyi kimi, 17 dekabr 2022-ci ildə Azərbaycan, Gürcüstan, Rumıniya və Macarıstan strateji tərəfdaşlıq haqqında saziş imzalayıblar. Saziş Qafqaz regionundan Avropaya enerji körpüsünün tikintisini nəzərdə tutur. Söhbət 1000 MVt gücündə və 1195 kilometr uzunluğunda Black Sea Energy sualtı elektrik kabelinin tikintisindən gedir. Kabel Azərbaycanda istehsal olunan "yaşıl" elektrik enerjisinin Gürcüstan və Qara dəniz vasitəsilə Rumıniyaya çatdırılması, daha sonra isə Macarıstana və Avropanın qalan hissəsinə daşınması üçün nəzərdə tutulacaq.

Hazırda layihə üzrə işlər planlaşdırılan texniki-iqtisadi əsaslandırmanın hazırlanması mərhələsindədir və 2023-cü ilin sentyabrında başa çatdırılması planlaşdırılır. Kabelin tikintisi 3-4 il davam edəcək.

Avropa Komissiyası dünyada ən uzun olacaq kabelin çəkilməsi üçün 2,3 milyard avro təqdim etməyi planlaşdırır.

Fevralın 3-də səhər Azərbaycan prezidenti bərpa olunan enerji mənbələri sahəsində layihələrdən danışarkən bu sahədə layihələrin həyata keçirilməsində aparıcı beynəlxalq maliyyə institutları ilə səmərəli əməkdaşlığa ümidvar olduğunu bildirib.

Prezident qeyd edib ki, Azərbaycanın bərpa olunan enerji mənbələri sahəsində mühüm  potensialı var: Xəzər dənizinin Azərbaycan sektorunda 157 QVt külək enerjisi, quruda 27 QVt külək və günəş enerjisi və 2020-ci il Vətən Müharibəsi zamanı azad edilmiş ərazilərdə (Qarabağ və Şərqi Zəngəzur). 10 QVt külək və günəş enerjisi.

"Artıq üç böyük energetika şirkəti – Masdar (BƏƏ, 10 QVt), Fortescue Future Industries (FFI, Avstraliya, 12 QVt) və ACWA Power (Səudiyyə Ərəbistanı, 2,5 QVt) ilə 25 QVt həcmində bərpa olunan enerji hesabına ölkədə əlavə istehsal güclərinin yaradılması barədə razılığa gəlinib", - o deyib.

Əliyev 17 dekabr 2022-ci ildə Buxarestdə imzalanmış "Azərbaycan, Gürcüstan, Rumıniya və Macarıstan hökumətləri arasında yaşıl energetikanın inkişafı və təchizatı sahəsində strateji tərəfdaşlıq haqqında saziş" ə uyğun olaraq Avropaya enerji körpüsünün çəkilməsi layihəsindən danışarkən əmin olduğunu bildirib ki, Azərbaycanın təchizatın coğrafiyasını genişləndirəcək, Rumıniya və Macarıstana "yaşıl" energetika tədarükü ilə məhdudlaşmayacaq. --0--