Bakıya COP29 sessiyasına 70-80 min xarici qonaq gələcək

Bakı/15.12.23/Turan: Gələn il Bakıda keçiriləcək COP29– Birləşmiş Millətlər Təşkilatının İqlim Dəyişmələri üzrə Çərçivə Konvensiyasının Tərəflər Konfransı sessiyasına 70-80 minə yaxın xarici qonaq gələcək. Bu barədə dekabrın 15-də Azərbaycan prezidenti İlham Əliyev gələn il Azərbaycanda COP29 sessiyasının keçirilməsilə bağlı işçi müşavirəsində bildirib.

Onun sözlərinə görə, COP29 forumunda iştirak edənlərin sayı indiyə qədər keçirilən tədbirlərlə müqayisə olunmur.

«Hətta Avropa Oyunlarını xatırlasaq,  5 min idmançı və onları müşayiət edən 3 minə yaxın qonaq gəlmişdi. COP29- a on minlərlə xarici nümayəndə gələcək və iki həftə ərzində Bakı dünyanın mərkəzi olacaq. Bəzi hesablamalara görə, ölkəyə təxminən 70-80 min xarici qonaq gələcək", - Əliyev qeyd edib.

Onun fikrincə, COP29 dünyanın ən nüfuzlu beynəlxalq tədbirlərindən biridir. "Ölkələrin təmsilçiliyi baxımından Birləşmiş Millətlər Təşkilatının Baş Assambleyasından geri qalmır. Ona görə də biz hazırlıq işlərinə dərhal start verməliyik. Bizim çox vaxtımız yoxdur -11 aydan az qalır", - Əliyev qeyd edib.

COP29-un keçirilməsi dünyaya nümayiş etdirəcək ki, Azərbaycanın əsas gündəliyi "yaşıl" enerjilə bağlıdır, baxmayaraq ki, ölkə böyük neft və qaz istehsalçısıdır. "Yaşıl" enerji növlərinin yaradılması və "yaşıl" enerjinin dünya bazarlarına nəqli hazırda biizm enerji siyasətimizin prioritetidir. Reallıq belədir və bütün dünya bunu bir daha görəcək", - dövlət başçısı vurğulayıb.- 06B-