Baronessa Nikolson Bakı və London arasında diplomatik münasibətlərin 30 illiyini qeyd etməyə gəlib

Bakı/09.03.22/Turan: Böyük Britaniya baş nazirinin Azərbaycan üzrə ticarət elçisi baronessa Emma Nikolson Bakıya üçgünlük səfərə gəlib. O, iki ölkə arasında diplomatik münasibətlərin qurulmasının 30 illiyinə həsr olunmuş tədbirlərdə  iştirak edəcək.

Böyük Britaniya səfirliyinin mətbuat xidmətinin məlumatında deyilir ki, səfər zamanı əsas diqqət Londonun Azərbaycan iqtisadiyyatının diversifikasiyasına və təmiz enerjiyə keçidinə dəstəyinə, eləcə də ərazilərin bərpası üçün gələcək kommersiya imkanlarının öyrənilməsinə yönəldiləcək.

Səfər martın 11-də Heydər Əliyev Mərkəzində Böyük Britaniya ilə Azərbaycan arasında diplomatik münasibətlərin 30 illiyinin bayram edilməsilə başa çatacaq.

Böyük Britaniya baş nazirinin ticarət nümayəndəsi bir sıra yüksək vəzifəli şəxslərlə görüşəcək. Müzakirələr üçün əsas mövzular  arasında regional enerji təhlükəsizliyi, iqlim dəyişikliyinə qarşı mübarizə, Böyük Britaniyanın geri qaytarılmış ərazilərin minalardan təmizlənməsi üzrə mühüm işlərə dəstəyi və kommersiya tərəfdaşlığının,  o cümlədən bərpa olunan enerji mənbələri sahəsində tərəfdaşlığın daha da genişləndirilməsi imkanları olacaq.

Baronessa Nikolson Azərbaycanda yeni təsis edilmiş Britaniya Ticarət Palatasında görüş keçirəcək, ADA Universitetinə gedəcək, FinTech, ICT sektorlarında və dəniz sahəsində Britaniya şirkətləri və tərəfdaşları ilə görüşəcək. O, Autizm Mərkəzinə baş çəkəcək.

“COVID pandemiyası səbəbindən ikillik fasilədən sonra Bakıya qayıda bilmək çox sevindiricidir. Şübhəsiz ki, neft-qaz sektoru və bunun Avropa üçün təmin etdiyi enerji təhlükəsizliyi mühüm əhəmiyyət kəsb edir və gələcək onilliklər ərzində ölkələrimiz arasında ticarət əlaqələrimizin ana xətti olmaqda qalacaq. Bununla belə, Azərbaycana hər səfərimdə iki ölkə arasında əməkdaşlığın necə genişləndiyini görmək xoş təəsürat bağışlayır”, - baronessa deyib. 06В-