Baş Prokurorluğun Ağır Cinayətlərə dair İşlər üzrə İstintaq İdarəsi ləğv edilib

Bakı/12.06.20/Turan: Azərbaycan prezidentinin sərəncamı ilə ölkənin Baş Prokurorluğunun yeni strukturu təsdiq edilib. Prokurorluq idarələrinin və şöbələrinin sayı 15-dən 18-ə çatdırılıb.

İdarəetmədə nəzarət mexanizminin optimallaşdırılması məqsədilə Baş prokurorun əlavə müavini vəzifəsi təsis edilib, Baş Prokurorluğun Ağır cinayətlərə dair işlər üzrə istintaq idarəsi ilə Bakı şəhər prokurorluğunun İstintaq idarəsi birləşdirilərək Baş Prokurorluğun İstintaq idarəsi yaradılıb. Nemət Əvəzov yeni strukturun rəisi vəzifəsinə təyin edilib.

Bəzi idarələr də ləğv edilib və onların bazasında aşağıdakı idarələr yaradılıb: Təşkilat və icraya nəzarət idarəsi,  Xidməti araşdırmalar idarəsi, Beynəlxalq hüquqi əməkdaşlıq idarəsi, Hüquqi təminat və insan hüquqları idarəsi, Kriminalistika və informasiya texnologiyaları idarəsi, Sənədlərlə və müraciətlərlə işin təşkili idarəsi.

Bundan başqa mərkəzi aparatın yeni Cinayət təqibindən kənar icraatlar və Xüsusi müsadirə məsələlərinin əlaqələndirilməsi idarələri yaradılıb.

Uzun illər mətbuat xidmətinin rəhbəri vəzifəsində işləmiş Eldar Sultanov Sənədlərlə və müraciətlərlə işin təşkili idarəsinin rəisi təyin edilib.

Mətbuat xidmətinin rəhbəri vəzifəsinin icrası isə əvvəllər Bakı Prokurorluğunda və paytaxtın Nəsimi rayon prokurorluğunda işləmiş Günay Həsənliyə həvalə edilib.

Qeyd edək ki, ləğv edilmiş Ağır Cinayətlərə dair İşlər üzrə İstintaq İdarəsi ən mənfur idarələrdən biri hesab olunurdu. Bir çox fəalların və jurnalistlərin işini məhz bu idarə aparırdı. İdarə həmçinin jurnalistlərin və vətəndaş cəmiyyəti fəallarının xarici səfərlərinə əsassız qadağalar tətbiq edirdi. AİHM sonradan bu qadağaların qanunsuz olduğu haqqında bir sıra qərarlar qəbul edib. -06D-