Baş Prokurorluq hüquq müdafiəçisi O. Gülalıyevin işi üzrə həkimlərin hərəkətlərini təkrarən araşdırmağa başlayıb

Bakı/21.01.21/Turan: 2019-cu ildə avtoqəzanın nəticəsində xəsarət almış və hazırda koma vəziyyətində olan hüquq müdafiəçisi Oqtay Gülalıyevin ailəsi yanvarın 21-də Respublikanın Baş Prokurorluğuna dəvət olunub.

Bu barədə Turana hüquq müdafiəçisinin oğlu Təbriz Gülalıyev məlumat verib.

T.Gülalıyevin sözlərinə görə, onlar prokurorluğa Baş Prokuror Kamran Əliyevə müraciət ünvalayadan sonra çağırılıblar. «Biz yanvarın ilk həftəsində Kamran Əliyevə müraciət göndərmişik. Müraciətdə atamın indiki vəziyyətdə günahkar olduğu hesab etdiyimiz həkimləri məsuliyyətə cəlb edilməsini və prosedurun sürətləndirməsini xahiş etmişik. Keçən ilin payızında həkimlər məsələsi hadisə ilə bağlı cinayət işindən ayrılaraq Nəsimi Rayon Prokurorluğuna göndərilib. Müraciətimizə cavab verilmirdi, amma məsələ ictimailəşəndən sonra bizi qəbula dəvət etdilər».

T.Gülalıyev qeyd edib ki, görüşdə onlara bildirilib ki, Nəsimi Rayon Prokurorluğunda qaldırılmış cinayət işinə xitam verilib. «Bizə dedilər ki, Nəsimi Rayon Prokurorluğu məsələ ilə bağlı 3 dəfə ekspertiza üçün müracət edib. Ekspertizaların hər üçünün rəyində göstərilib ki, həkimlərin əməllərində cinayət tərkibi olmadığına görə dekabrın 24-də müstəntiq tərəfindən cinayət işinə xitam verilib və bu barədə qərarın surəti bizə göndərilib».

Lakin hüquq müdafiəçisinin ailəsi belə bir qərarın almadığını deyir.

T.Gülalıyev həmçinin bildirib ki, ailəsinin müraciətindən sonra cinayət işi yenidən açılıb. «Bizə deyilib ki, cinayət işinə xitam verilməsi haqqında qərar ləğv edilib və məsələni yenidən Nəsimi Rayon Prokurorluğu tərəfindən yenidən araşdırılması barədə qərar verilib».

Vəkil Fuad Ağayev da Turana bildirib ki, Oqtay Gülalıyevin işində həkimlərin məsuliyyətin olub-olmaması ilə bağlı qaldırılmış cinayət işinə xitam verilməsi barədə qərarın surətini almayıb.

Məsələ ilə bağlı Baş Prokurorluqdan münasibət öyrənmək mümkün olmayıb.

O.Gülalıyevin yaxınlarının dediklərinə, hələlik, "Baku City Hospital"dan münasibət almaq mümkün olmayıb. Amma bundan əvvəl ölkənin Səhiyyə Nazirliyindən bildirilmişdi ki, O.Gülaliyevin əməliyyatı ailəsinin tərəddüdləri üzündən bir müddət yubanıb. Tərəddüdlər nədən ibarətdir izah edilmir.

Keçən ilin noyabrın 13-də bu məsələ ilə bağlı keçirilən məhkəmə prosesində isə 1 saylı Kliniki Tibbi Mərkəzin həkimləri də demişdilər ki, onlar O.Gülalıyevin baş nahiyəsində olan xəsarətlərin fəsadlarını aradan qaldırmaq üçün bütün lazım olan tədbirləri görüblər. Lakin məhkəmədə məlum olub ki, həkimlər Gülalıyevin müayinəsinin nəticələrini yalnız 17 saatdan sonra Baku City Hospital-ə çatdırıblar.

Hüquq müdafiəçisi O.Gülalıyevin 2019-cu il oktyabrın 29-da Bakının mərkəzində piyada keçidində avtomobillə vurulduğu bildirilir. Onun başından aldığı zədə nəticəsində hələ də komada olduğu deyilir.

Fakt üzrə Cinayət Məcəlləsinin 263.1.1-ci (yol hərəkəti və nəqliyyat vasitələrinin istismarı qaydalarının pozulması, ehtiyatsızlıqdan zərər çəkmiş şəxsin sağlamlığına ağır zərər vurulmasına səbəb olduqda) maddəsi ilə cinayət işi qaldırılıb.

O.Gülalıyev qəzadan sonra, elə 2019-cu il oktyabrın 29-da axşam Bakıdakı Kliniki Tibbi Mərkəzə gətirilib. Oktyabrın 30-də isə "City Hospital"da əməliyyat edilib. Sonra Bakıdakı Respublika Neyrocərrahiyyə Xəstəxanasına köçürülüb. 2019-cu il noyabrın 5-də Heydər Əliyev Fondunun dəstəyi ilə müalicəsini davam etdirmək üçün Türkiyənin İstanbuldakı Avrasiya Klinikasına yerləşdirilib. Noyabrın 20-dən onun müalicəsi Amerika Xəstəxanasında davam etdirilib.

Ötən ilin noyabrında, məhkəməsi başlanmazdan öncə isə onun Bakıya gətirildiyi açıqlanıb.

O.Gülalıyevin vurulduğu avtomobilin sürücüsü hadisəni qəsdən törətmədiyini, bunun ehtiyatsızlıqdan baş verdiyini söyləyib. Ancaq Azərbaycanda bəzi fəallar, müxalifət təmsilçiləri rəsmi açıqlama və sürücünün dediklərinə şübhə ilə yanaşırlar.

Bu müddət ərzində hüquq müdafiəçisi dörd dəfə əməliyyat olunub.—0—