Baş Prokurorluq korrupsiyaya qarşı mübarizə haqqında hesabat verib

Bakı/15.01.19/Turan: Ölkə Baş Prokurorluğunun Korrupsiyaya qarşı Mübarizə İdarəsinin rəisi Kamran Əliyev çərşənbə axşamı ənənəvi brifinqini keçirib, burada hökumət KİV-lərinə il ərzində görülmüş işlər haqqında hesabatını oxuyub.

Ad, vəzifə və təşkilat adı çəkməyən Əliyev deyib ki, ötən il 25 vəzifəli şəxs xəbərdarlıq, 16 nəfər töhmət, üç nəfər ciddi töhmət alıb, 17 nəfər vəzifədən azad edilib.

Daha sonra o bildirib ki, 2018-ci ildə prokurorluq Dövlət Gömrük Komitəsindən 17 material, Vergilər Nazirliyindən 7, Ekologiya Nazirliyindən 21, Qida Təhlükəsizliyi Agentliyindən səkkiz, Dövlət Arxitektura və Şəhərsalma Komitəsindən 6 material araşdırıb. 43 material üzrə cinayət işləri açılıb.

Daha sonra prokuror uzun müddət nəzarətdən kənarda qalan daş karxanalarının fəaliyyətinə nəzarətin gücləndiyini bildirib. Ekologiya Nazirliyinin materialları əsasında prokurorluq məhkəməyə 26 şəxs barəsində 21 cinayət işi göndərib.

21 milyon manat ziyan müəyyən edilib, bunun 10,5 milyon manatı ödənilib.

Həmçinin, 1,2 milyon manatdan çox dəyəri olan əmlaka həbs qoyulub.

Prokurorluq inşaat sahəsinə nəzarəti də gücləndirib, burada şirkətlər işçilərin əmək hüquqlarını pozurlar. Bir sıra şirkətlərin rəhbərlərinə xəbərdarlıq edilib, 400-dən çox işçi ilə əmək müqaviləsi bağlanıb.

Əliyev həmçinin "Lifttəmir" istehsalat birliyində korrupsiya faktlarının araşdırılmasından bəhs edib, burada da rəis vəzifədən azad edilib.

Eyni zamanda prokuror son günlər bir sıra nazirlərin, dövlət məmurlarının və bankirlərin xaricdə çoxmilyonluq daşınmaz əmlakı ilə bağlı yayılan çoxsaylı qalmaqallı məlumatları şərh etməyib. -02D-