Bayden Erdoğanın Ankaranın İsveçin NATO-ya daxil olmasını dəstəkləməyə hazır olduğu haqqında bəyanatını alqışlayıb

Vaşinqton/11.07.23/Turan: Bu gün ABŞ prezidenti Co Bayden Vilnyusda NATO lliderlərinin sammiti çərçivəsində türkiyəli həmkarı Recep Tayyip Erdoğanla ikitərəfli görüş keçirəcək, xəbəri Ağ Evdən Turan-ın Vaşinqtondakı müxbiri verib.

Bu addım bazar ertəsi Erdoğanın İsveçin hərbi alyansa qoşulması haqqında protokolları təsdiq etməyə razılaşmasından sonra atılıb. Bayden bu xəbəri alqışlayıb və çox güman ki, Macarıstanı - İsveçin müraciətini hələ dəstəkləməyən sonuncu ölkəni də bu addımı atmağa vadar edəcək.

"Mən Türkiyə, İsveç və NATO baş katibinin bu gün axşam səsləndirdiyi bəyanatı, o cümlədən prezident Erdoğanın İsveçin qoşulması haqqında Protokolu tezliklə təsdiq edilməsi üçün Türkiyə Böyük Millət Məclisinə təqdim etmək öhdəliyi götürməsini alqışlayıram", deyə ABŞ prezidentinin bəyanatında bildirilir.

Daha sonra o, əlavə edib: "Mən Avroatlantika regionunda müdafiənin gücləndirilməsi üzərində işləməyə hazıram. Mən NATO üzrə 32-ci müttəfiqimiz qismində baş nazir Kristersson və İsveçlə görüşü səbirsizliklə gözləyirəm. Və mən Baş Katib Stoltenberqə sarsılmaz liderliyinə görə təşəkkür edirəm".

Ötən həftə baş nazir Kristerssonla görüşən Bayden son günlər fəal şəkildə Erdoğanı razılaşdırmağa çalışırdı, çünki o, bugünki sammit zamanı İsveçin NATO-ya daxil olmasına nail olacağına ümid edirdi.

Lakin Erdoğan İsveçin PKK ilə bağlı mövqeyindən ciddi narahatlığını bildirib. Bazar ertəsi Türkiyə prezidenti qeyd edib ki, İsveçin NATO-ya üzvlüyü haqqında müraciəti təsdiq etməzdən əvvəl Brüssel Ankaranın Avropa İttifaqına daxil olması üçün də yolu təmizləməlidir. Ankara 1987-ci ildən etibarən rəsmi olaraq Aİ-yə daxil olmağa çalışırdı, o vaxt Aİ-nin sələfinə üzvlük üçün müraciət vermişdi. Uzun illər ərzində danışıqlar çıxılmaz nöqtəyə çatıb. 

Lakin Dövlət Departamenti bazar ertəsi açıq şəkildə bildirib ki, onlar Türkiyənin Aİ-yə daxil olmaq səylərinin İsveçin NATO-ya daxil olmasına mane olmalı olduğuna inanmırlar.

"Birləşmiş Ştatlar bir neçə il ərzində Türkiyənin Aİ-yə daxil olmaq cəhdini dəstəkləyib və biz bunu etməyə davam edirik", deyə baş katib Metyu Miller Turan-ın suallarına cavabda bildirib və əlavə edib ki, son nəticədə hər şey Aİ və Türkiyədən asılıdır.

"Amma biz hesab etmirik ki, bu, İsveçin NATO-ya daxil olması üçün maneə olmalıdır", deyə Miller mətbuat üçün gündəlik brifinqdə bildirib.

Mətbuat katibinin sözlərinə görə, dövlət katibi Entoni Blinken son bir neçə gün ərzində Türkiyənin xarici işlər naziri Hakan Fidanla söhbətlərində "bunu qeyd edib". Son bir neçə gündə onlar üç dəfə söhbət ediblər.

"Biz İsveçin Türkiyənin dilə gətirdiyi problemlərin həlli üçün bir sıra addımlar atmasında israr etməyə davam edirik və hesab edirik ki, Türkiyənin İsveçin NATO-ya daxil olmasını dəstəkləməyinin vaxtıdır", deyə Miller bildirib.

Aleks Raufoğlu