Bayramov və Mirzoyanla görüşdə Blinken onları ayın sonuna qədər “yenidən görüşməyə” çağırıb

Vaşinqton/20.09.22/Turan: ABŞ dövlət katibi Entoni Blinken bazar ertəsi Nyu-Yorkda 200-dən çox insanın ölümü ilə nəticələnən sərhəd döyüşlərindən sonra  birbaşa danışıqlar üçün Azərbaycan və Ermənistan xarici işlər nazirləri Ceyhun Bayramov və Ararat Mirzoyanı Nyu-Yorkda qəbul edib.

Görüş New York Palace Hoteldə baş tutub və bir saata yaxın davam edib. TURANın Vaşinqton müxbiri xəbər verir ki, iclasda dövlət katibinin köməkçisi Karen Donfrid və Qafqaz danışıqları üzrə baş müşaviri səfir Fil Riker də iştirak ediblər.

Dövlət Departamentinin sözçüsü Ned Prays görüşün yekunları üzrə Turan-a bildirib ki, dövlət katibi Blinken ölənlərlə bağlı başsağlığı verib və sülh prosesinə qayıtmağın vacibliyini vurğulayaraq, yeni döyüşlərin qarşısının alınmasının vacibliyini vurğulayıb.

"Tərəflərin növbəti addımları müzakirə edildi və dövlət katibi onları ayın sonuna qədər yenidən görüşməyə çağırdı", - Prays bildirib.

Blinken iclası açaraq son döyüşlər zamanı həlak olanların və yaralananların ailələrinə başsağlığı verib. “Döyüşlərin dayanması və son günlər yeni döyüşlərin olmaması bizi ruhlandırır.

Dövlət Departamenti rəhbərinin sözlərinə görə, həm Ermənistanın baş naziri Paşinyan, həm də Azərbaycan prezidenti Əliyev son söhbətləri zamanı ona sülhə “hazır” olduqlarını bildiriblər. “Davamlı diplomatik əlaqə hamı üçün ən yaxşı yoldur. Ermənistanla Azərbaycan arasında fikir ayrılıqlarının hərbi yolla həlli yoxdur. Ancaq düşünürəm ki, fikir ayrılıqlarını diplomatiya yolu ilə həll edən davamlı sülhə aparan bir yol var” deyən o, ABŞ-ın “bu səyləri dəstəkləmək üçün əlindən gələni etməyə hazır olduğunu” söylədi.

ABŞ-ın Bakıdakı keçmiş səfiri Riçard Kozlariç bildirib ki, tərəflərin yenidən görüşməyə çağırışı “ABŞ-ın ikitərəfli prosesi irəlilətmək üçün konkret planının olmadığını deməyə əsas verir”.

“Bu, mənə 1994-cü ili, Minsk Qrupunun yaradılmasından əvvəlki dövrü xatırladır, o zaman ABŞ, Rusiya, İran və Türkiyə münaqişə tərəfləri ilə birtərəfli diplomatiya aparmağa çalışırdılar”, - Kozlariç TURANın Vaşinqton müxbirinə görüşün nəticəsini şərh edərərək deyib.-0-