Belarus və Azərbaycan hərbi-texniki əməkdaşlıq məsələlərini müzakirə ediblər

Bakı/17.05.18/Turan: Mayın 16-da Azərbaycanın müdafiə naziri, general-mayor Zakir Həsənov Belarus Dövlət Hərbi-Sənaye Komitəsinin sədri, general-mayor Oleq Dviqalyovun rəhbərlik etdiyi nümayəndə heyəti ilə görüşüb.
Görüşdə hərbi və hərbi-texniki sahədə əməkdaşlıq məsələləri müzakirə edilib. Bu barədə Müdafiə Nazirliyinin mətbuat xidməti məlumat verib.

Tərəflər Belarus hərbi-sənaye kompleksi müəssisələrinin istehsal etdiyi bütün qoşun növləri üçün nəzərdə tutulmuş müxtəlif təyinatlı hərbi məhsulların Azərbaycan ordusunun silahlanmasına qəbul edilməsini müsbət qiymətləndiriblər.
Həmçinin hərbi-texniki əməkdaşlıq məsələlərinin geniş spektri müzakirə edilib, Azərbaycan ordusunun döyüş qabiliyyətinin daha da yüksəldilməsinə yönəlmiş yeni böyük layihələrin həyata keçirilməsi istiqamətləri müəyyənləşdirilib.
Azərbaycanla Belarus arasında hərbi əməkdaşlıq 2004-cü ildən inkişaf etməyə başlayıb. Belarus T-72 tankları, 203 mm. kalibrli 2C7 "Pion" özüyeriyən artilleriya qurğusu, BTR-70, 152 mm. kalibrli qaubitsa, Su-25 təyyarələri, iki divizion "Buk-MB" zenit-raket kompleksi, Ukrayna-Belarus istehsalı olan "Skif" tank əleyhinə raket kompleksi("Pelenq" ASC nişanalma sistemi göndərir), "Polonez" yaylım atəşli reaktiv sistem (RCZO) göndərib.-0-