Beynəlxalq Qırmızı Xaç Komitəsinin nümayəndələri Azərbaycanda saxlanılan iki erməni hərbçiyə baş çəkiblər

Bakı/08.06.23/Turan: Beynəlxalq Qırmızı Xaç Komitəsinin nümayəndələri mayın 26-da saxlanılan iki Ermənistan vətəndaşına baş çəkiblər.

Beynəlxalq Qırmızı Xaç Komitəsinin Bakı nümayəndəliyinin ictimaiyyətlə əlaqələr şöbəsinin rəhbəri İlahə Hüseynova bildirib ki, saxlanılanlarla təkbətək görüş keçirilib və onlara Qızıl Xaç məktubu vasitəsilə ailələrilə əlaqə saxlamaq imkanı verilib.

Beynəlxalq Qırmızı Xaç Komitəsi öz mandatına uyğun olaraq saxlanılan şəxslərin saxlanma şəraiti və onlarla rəftarı qiymətləndirir, onların ailələrilə əlaqəsinin bərpasına və ya əlaqə yaratmasına şərait yaradır. Beynəlxalq Qırmızı Xaç Komitəsinin prosedurlarına uyğun olaraq, başçəkmələrlə bağlı müşahidə və tövsiyələr yalnız saxlayan tərəfin diqqətinə çatdırılır, Hüseynova qeyd edib.

Ermənistanlı hərbçilər Arut Ovagimyan və Karen Kazaryan mayın 26-da Zəngilan rayonunun Rəzdərə kəndi yaxınlığında saxlanılıb.

Azərbaycan Dövlət Sərhəd Xidməti bildirib ki, onlar təxribat qrupunun üzvləri olublar və qarşısı alınıb.

Saxlanılanlara qarşı Cinayət Məcəlləsinin bəzi maddələri, o cümlədən terrorizm, silah qaçaqmalçılığı, sərhədin pozulması maddələri üzrə ittihamlar irəli sürülüb. 16B