Birləşmiş Millətlər Təşkilatı Qarabağdan gedən ermənilərə qarşı insidentlərin olmadığını təsdiqləyib

Bakı/29.09.23/Turan: Birləşmiş Millətlər Təşkilatı bildirib ki, Azərbaycanın Qarabağ regionunda yaşayan ermənilərin Ermənistana gedişi zamanı mənfi rəftar halları qeydə alınmayıb. “Anadolu” agentliyinin məlumatına görə, bu barədə Birləşmiş Millətlər Təşkilatının qaçqınlar üzrə ali komissarının Ermənistandakı nümayəndəsi Kavita Belani Birləşmiş Millətlər Təşkilatının Cenevrə ofisinin həftəlik mətbuat konfransında bildirib. O, Azərbaycanın Qarabağ regionundan minlərlə adamın Ermənistana miqrasiyası və onların Ermənistandakı vəziyyətindən danışıb.

Onun sözlərinə görə, bir həftədən az müddətdə 88 700-dən çox adam Qarabağı tərk edərək Ermənistana gedib. Belani bildirib ki, onlar "fövqəladə humanitar vəziyyətdən narahatdır".

Belani qeyd edib ki, Ermənistan hökuməti Birləşmiş Millətlər Təşkilatı və digər qeyri-hökumət təşkilatlarının dəstəyilə onların müdafiəsinə və yardıma görə məsuliyyəti öz üzərinə götürüb.

Türkiyə agentliyinin müxbirinin "Bu adamlar gedərkən onlarla hər hansı pis rəftar qeydə alınıbmı?" sualına Belani belə cavab verib:" Bilirəm ki, indiyədək heç bir insident qeydə alınmayıb. Heç bir amansız rəftar hadisəsi qeydə alınmayıb. Bu, uzun bir yoldur, yollarda tıxaclar var, adamlar çətin vəziyyətdir. Lakin azərbaycanlılar tərəfindən amansız rəftar halları qeydə alınmayıb". 06B